Baıroıt ýnıversıtetiniń janyndaǵy Bavarıa eksperımentaldyq geohımıa jáne geofızıka ǵylymı-zertteý ınstıtýtynyń ǵalymdary bastaǵan halyqaralyq zertteýshiler toby planeta betinen 2900 shaqyrym tereńdikte Jer qalyptasqan kezden saqtalǵan kóne sý qory bolýy múmkin ekenin anyqtady, dep habarlaıdy infohub.kz saıty.
Bul boljamdy tekserý úshin mamandar zerthanada tómengi mantıanyń ekstremaldy jaǵdaıyn jasady. Almaz balǵalar men lazerlerdiń kómegimen úlgilerdi atmosferalyq qysymnan eki mıllıon ese asatyn qysymmen syǵyp, 2500 gradýs Selsıge deıin qyzdyrdy.
Tájirıbe barysynda buryn belgisiz bolǵan eki temir oksıgıdroksıdi túzildi. Jumys avtorlarynyń pikirinshe, dál osy qosylystar mantıa men ıadro shekarasynda sýdy ustap turýǵa qabiletti.
Taldaý kórsetkendeı, tyǵyz mıneraldyq qosylystar sýtegi az mólsherde bolǵannyń ózinde de túzile alady. Zertteý avtorlarynyń biri Leonıd Dýbrovınskıdiń aıtýynsha, bul mıneraldar bastapqy sýdy da, tektonıkalyq plıtalardyń qozǵalysymen tereńge tartylatyn ylǵaldy da uzaq ýaqyt ustap turýǵa minsiz úmitker bolyp sanalady.
Jumys nátıjeleri Nature Geoscience jýrnalynda jarıalandy. Olar sý aınalymyn jáne Jerdiń ishki qurylymynyń evolúsıasyn jaqsyraq túsinýge kómektesedi. Tájirıbe zerthanada ótkenimen, ol planetanyń kóne sý qorlaryn qaıda jasyratyny týraly mańyzdy derekter beredi.