Qazaqstan Densaýlyq saqtaý mınıstrligi júrgizýshi kýáligin alýǵa úmitker azamattardy medısınalyq tekserýden ótkizý erejesine ózgerister jobasyn daıyndady. Tıisti qujat «Ashyq NQA» portalynda jarıalandy, dep habarlaıdy infohub.kz saıty.
Basty jańalyq — esepke alýdy sıfrlandyrýǵa qatysty. Medısınalyq tekserý nátıjeleri týraly málimetter biryńǵaı avtomattandyrylǵan derekqorǵa jiberiletin bolady.
«Júrgizýshilerdiń medısınalyq jaramdylyǵy týraly, sondaı-aq medısınalyq qorytyndymen rastalǵan qarsy kórsetilimderdiń bar-joǵy týraly aqparat avtomatty túrde aqparattyq derekqorǵa beriledi», — delingen qujatqa qosa berilgen túsindirme jazbada.
Qajetti málimetterge óz quzyreti sheginde ýákiletti memlekettik organdar qol jetkizedi. Bul beıindi qyzmetterge jaramdylyqtyń ózektiligin jedel tekserýge múmkindik berip, jalǵan nemese eskirgen aqparatty paıdalaný qaýpin aıtarlyqtaı azaıtady.
65 jastan asqan júrgizýshiler men múgedektigi bar avtokólik ıeleri úshin qaıta medısınalyq tekserýden ótý merzimi bólek naqtylanady. Olar dárigerlik komısıadan eki jylda bir ret ótýge mindetti.
«Atalǵan sanattaǵy júrgizýshiler úshin medısınalyq tekserý merzimdiligine qoıylatyn jańa talaptar engizilmeıdi», — dep atap kórsetilgen jobada.
Bul norma jol qozǵalysy týraly zańda burynnan qarastyrylǵan, al qazirgi ózgerister qoldanystaǵy erejelerdi zańnamaǵa sáıkestendirýge baǵyttalǵan. Mınıstrlik reformanyń negizgi baǵyty sıfrlyq esepke alý men aqparatty ýaqtyly jańartýǵa qoıylǵanyn qosty.
Buıryq jobasyn Densaýlyq saqtaý mınıstrligi 2026 jylǵy 24 maýsymdaǵy zańnyń normalaryn iske asyrý aıasynda ázirledi. Qujat «Ashyq NQA» portalynda jarıa talqylaýǵa qoıyldy. Ózgerister mehanıkalyq kólik quraldaryn júrgizýshilerdi tekserý tártibin retteıtin 2020 jylǵy 30 qazandaǵy buıryqqa engizilýde.
Buǵan deıin jazda 073/ý nysanyndaǵy medısınalyq anyqtamany alýǵa qyzyǵýshylyq kúrt artqany habarlanǵan. Maýsymda qazaqstandyqtar 37 myńǵa jýyq qujat rásimdese, tamyzda bul kórsetkish tórt ese ósken. Densaýlyq saqtaý mınıstrligi ajıotajdy İİM-niń zeınetkerlik jastaǵy júrgizýshilerge qoıǵan baqylaýyn kúsheıtýimen túsindirdi.
25 tamyzdan bastap Qazaqstanda «Jol qozǵalysy týraly» zańǵa engizilgen ózgerister kúshine endi.