Ońtústik Afrıkada boks chempıony Zolanı Teteniń óltirilýine baılanysty tórt adam ustaldy. Bul týraly infohub.kz habarlaıdy.
38 jastaǵy Tete juma kúni úıiniń aldynda qastandyqpen óltirildi. Onymen birge bolǵan jas áıel de oqqa ushyp, aýrýhanaǵa jatqyzyldy.
Ustalǵandardyń biri — 22 jastaǵy er adam senbide qamaýǵa alynyp, dúısenbide alǵashqy sot otyrysyna qatysady. Oǵan kisi óltirý jáne kisi óltirýge oqtalý aıyptary taǵylýy múmkin.
Tete 2017-2019 jyldary WBO boks belbeýin, al 2014 jyly IBF sýper jeńil salmaqtaǵy tıtýlyn ıelengen. Keıin ol tórt jylǵa dıskvalıfıkasıalanǵan bolatyn, merzimi bıyl shildede aıaqtaldy.
Jeksenbide ustalǵan qalǵan kúdiktiler seısenbide sotqa keledi. Olardyń ekeýine qarý men oq-dárini zańsyz saqtaý aıyby taǵylyp otyr. Olarǵa kisi óltirý jáne kisi óltirýge oqtalý aıyptarynyń taǵylýy ázirge belgisiz.
Resmı derekterge sáıkes, Tete úıiniń qaqpasy ashylýyn kútip, kóliginde otyrǵan kezde eki betperdeli qarýly adam kólikten shyǵyp, oǵan jáne 27 jastaǵy jolaýshy áıelge oq jaýdyrǵan.
Eki dúrkin álem chempıonynyń qazasyna baılanysty kóptegen kóńil aıtýlar aıtylýda. Ońtústik Afrıkanyń sport mınıstri Gaıton Makkenzı: «Ońtústik Afrıka óziniń eń úzdik boksshylarynyń birinen aıyryldy», — dedi.
Burynǵy sport mınıstri Fıkıle Mbalýla da Tetege qurmet kórsetip, «boks sportyna orasan zor úles qosqan uly ońtústikafrıkalyqtyń» qazasyna ókinish bildirdi.
Tete 2015 jyly Lıverpýldik Pol Batlerdi jeńgen bolatyn. Ol Ulybrıtanıada segiz ret óner kórsetken.
Sondaı-aq ol tıtýldyq jekpe-jektegi eń jyldam nokaýt boıynsha Gınness rekordyna ıe. 2017 jyly ol Sıbonıso Gonány 11 sekýndta nokaýtqa jibergen.
Tete sońǵy ret 2022 jyldyń shildesinde Londonda brıtanıalyq Djeıson Kannıngemdi nokaýtpen jeńgen, biraq keıin dopıng-testinen ótpegendikten nátıje joıyldy. Onyń synamasynda anabolıkalyq steroıd stanozolol tabylyp, Ulybrıtanıanyń dopıngke qarsy agenttigi ony dıskvalıfıkasıalaǵan.
Qaıtys bolǵannan keıin menedjeri Mla Tengımfene onyń dıskvalıfıkasıa merzimi aıaqtalǵan soń rıngke qaıta oralýǵa daıyndalyp jatqanyn rastady.
Tete 34 jekpe-jektiń 29-ynda jeńiske jetken, tórt ret jeńilip, bir jekpe-jegi joıylǵan.