InfoHub Logo

Алматыда есірткі бизнесіне жастарды тартудың жаңа әдістері анықталды. Полиция мәліметінше, есірткіні «қолдан-қолға» сату әдісі азайып, оның орнына «закладка» және жасырын интернет арқылы сату әдістері көбейген.

Бұл туралы Infohub.kz ақпарат агенттігі хабарлайды.

Алматыда қанша кәмелетке толмаған «закладчиктер» ұсталды

Биыл Алматыда есірткі бизнесіне жастардың тартылуы айтарлықтай артқан. Қылмыстық кодекстің 297-бабы («Есірткі заттарын сату») бойынша жыл басынан бері 158 факті тіркелген. Өткен жылдың осы кезеңінде бұл көрсеткіш 132 болған.

2026 жылы есірткі «салушы» ретінде алты жасөспірім ұсталды, ал өткен жылы олардың саны төртеу еді.

Есірткі бизнесімен айналысқан алты жасөспірімнің үшеуі Алматыда оқиды. Қалғандары Алматы облысынан келген екі мектеп оқушысы мен бір колледж студенті. Олар қала сыртында білім алғанымен, қылмыс жасау үшін Алматыға келген.

Ұсталғандардың ең кішісі – 16 жастағы 10-сынып оқушысы. Аталған алты қылмыстық іс бойынша тергеу жалғасуда. Күдіктілерге 10 жылға дейін бас бостандығынан айыру жазасы кесілуі мүмкін.

Instagram арқылы «закладчиктерді» вербовкалау

Полиция мәліметінше, есірткі сатушылар жастарды есірткі бизнесіне тарту үшін Telegram-боттар мен QR-кодтардан бөлек, Instagram-дағы таргеттелген жарнаманы да қолдана бастаған. Бұл жарнамалар әлеуметтік желіде жеңіл ақша тапқысы келетін жастарға бағытталады.

Қазіргі уақытта Қазақстан бойынша «Кибернадзор» жүйесі арқылы 500-ге жуық есірткіге қатысты сайт пен парақша бұғатталды.

Алматының қауіпті аймақтары

Есірткіні жарнамалауға қатысты 299-бап бойынша Алматыда 4 қылмыстық іс қозғалған. Есірткі жарнамалары көбінесе бейнебақылау камералары аз орналасқан, тыныш аудандарда кездеседі. Полицияның айтуынша, ең көп таралған аймақтар – Әуезов, Түрксіб және Бостандық аудандарының кейбір бөліктері.

Қазіргі таңда жастар арасында синтетикалық есірткі мен психоактивті заттар кең таралған. Олардың ең қауіптісі – бірінші қолданыстан-ақ тәуелділік тудыратын синтетикалық есірткілер.

Балаңыздың «закладчик» екенін қалай анықтауға болады?

Ата-аналар үшін баланың мінез-құлқындағы күрт өзгерістер – агрессия, мазасыздық, апатия, қымбат заттардың пайда болуы және жиі түнде серуендеуі – назар аударуға тұрарлық белгілер. Егер бала түнде жиі жоғалып кетіп, қайда баратынын нақты түсіндіре алмаса, бұл ата-аналарға ескерту болуы тиіс.