InfoHub Logo

Алматы қаласы Бостандық ауданындағы көшелерді жасанды интеллект (ИИ) арқылы тазартқан деген дау жалғасын тапты. Қала әкімдігі қызметтік тергеу бастап, қоқысқа толған урналар мен лас аумақтар үшін жауапты тұлғаларға айыппұл салды.

Бұл туралы Infohub.kz ақпарат агенттігі хабарлайды.

Не болды?

Аудан әкімдігінің мәліметінше, әлеуметтік желіде жарияланған, ИИ технологиялары қолданылған болуы мүмкін деген күдік тудырған суреттерге қатысты тексеру басталды. Левитан көшесіндегі, №125 мектептің дәл алдындағы аумақтың «бұрын» және «кейін» түсірілген суреттеріндегі сәйкессіздіктерді желі қолданушылары байқаған. Бұл суреттерді әлеуметтік желі ИИ арқылы жасалған немесе өңделген контент ретінде белгілеген.

Тексеру нәтижесі қандай болды?

Әкімдік аумақтың аудандық маңызы бар екенін және оған «Жасыл Жер Алматы» ЖШС мердігерлік ұйымы қызмет көрсететінін хабарлады. Кесте бойынша урналар күніне екі рет тазартылуы тиіс. Алайда, адам көп жүретін және көлік қатынасы қарқынды болғандықтан, кейбір уақыттарда урналардың толып қалуына жол берілген. Бұл жағдай аумақтың санитарлық жағдайын нашарлатқан. Бостандық ауданы әкімі аппараты мен аудандық табиғат қорғау полициясы бөлімінің бірлескен тексеруі нәтижесінде жауапты тұлғаларға әкімшілік ықпал ету шаралары қолданылды.

Мердігер Әкімшілік құқық бұзушылық туралы кодекстің 505-бабының 1-бөлігі бойынша – абаттандыру ережелерін бұзғаны үшін жауапқа тартылды. Айыппұл мөлшері бұзушының санатына байланысты: жеке тұлғаларға – 20 АЕК, шағын бизнеске – 30 АЕК, орта бизнеске – 40 АЕК, ірі бизнеске – 100 АЕК болады. Бір жыл ішінде қайта бұзған жағдайда айыппұл сомасы артады.

Қазіргі таңда мердігерлер аумақты ретке келтіріп, барлық қоқыс тазартылғанына әкімдік сендірді.

Бұған дейін не болған еді?

Бұған дейін, мамыр айының ортасында, Алматы тұрғыны Бостандық ауданы әкімдігінің көшелерді тазарту үшін ИИ қолданды деген күдігін алға тартқан болатын. Бұл жазба желіде тез таралып, 100 мыңға жуық қаралым жинады. Қолданушылар суреттердегі сәйкессіздіктерді, соның ішінде бірдей көлеңкелер мен ракурстарды байқаған.