InfoHub Logo

Алматыдағы жаңа «Қалқаман» метро станциясының ішкі көрінісі мен айналасындағы абаттандыру жұмыстарының барысы белгілі болды. Қала әкімі Дархан Сатыбалды құрылыс алаңына барып, жұмыстардың қалай жүріп жатқанын көзбе-көз тексерді.

Бұл туралы Infohub.kz ақпарат агенттігі хабарлайды.

Жұмыстардың аяқталу кезеңі

Әкімнің айтуынша, станциядағы әрлеу жұмыстары аяқталуға жақын. Эскалаторлар мен лифтілер орнатылып, желдету, бейнебақылау, пойыз қозғалысын басқару және өрт қауіпсіздігі жүйелері сияқты инженерлік коммуникацияларды монтаждау жұмыстары жүргізілуде. Құрылыс-монтаж жұмыстарын 2026 жылдың бірінші жартыжылдығының соңына дейін аяқтау жоспарланған.

Айналасын абаттандыру

Станция маңындағы 7 гектар аумақта ауқымды көгалдандыру жұмыстары қарастырылған. Мұнда ағаштар мен мыңнан астам бұталар отырғызылып, жаяу жүргіншілер аймақтары, жарықтандыру, автотұрақтар, автобус аялдамалары және қоғамдық көліктерге арналған орындар жасалады.

Жаңа тоннельдің маңызы

Айта кетейік, ақпан айының ортасында «Қалқаман» станциясы Алматының қолданыстағы метро желісіне қосылды. «Бауыржан Момышұлы» мен «Қалқаман» станциялары арасындағы ұзындығы 1 593 метрлік оң жақ тоннельді құрылысшылар бұрғылап өткен болатын. Қала билігінің мәліметінше, тоннельде рельстер мен жанасу рельсі төселіп, барлық инженерлік коммуникациялар орнатылды.