InfoHub Logo

Алматыда ата-аналар өз балаларына уәде етілген рөлдерді алмағаны үшін белгілі актерлерді жауапқа тартуды талап етті. Бұл туралы Stan.kz ақпарат агенттігі хабарлайды.

КТК телеарнасының хабарлауынша, ата-аналар киностудияға әрқайсысы бір жарым миллион теңгеден төлеген. Ақшаны бергеннен кейін компания кеңсесі жабылып, студия басшысы қаржылық қиындықтар туындағанын мәлімдеген.

Зардап шеккендер полицияға арызданып, тек продюсерлік орталық басшысын ғана емес, жұртты түсірілімге шақырған жұлдыздарды да жауапқа тартуды сұрауда. Себебі, олардың айтуынша, актерлердің белсенді жарнамасы арқылы компанияға сенім артқан.

Қылмыстық іс қозғалды

Құқық қорғау органдары «Алаяқтық» бабы бойынша іс жүргізіліп жатқанын хабарлады. Егер компанияның кінәсі дәлелденсе, оның негізін қалаушы 3 жылдан бас бостандығынан айырылуы мүмкін.

«Қазіргі таңда ресми түрде 130 жәбірленуші анықталды. Олардың барлығы полицияға арыз берген. Сотқа дейінгі тергеу бір өндіріске біріктірілді. Тергеу барысында аудиттік сараптама тағайындалды», — деді Алматы қалалық ПД ресми өкілі Салтанат Әзірбек.

Актерлер бұл жағдайға қатысты көпшілік алдында пікір білдіруден бас тартты. Алайда, жеке әңгімеде бұрынғыдай барлық жоспарланған фильмдерге тегін де болса қатысуға дайын екендерін айтты. Студия басшысы да жауап беруден бас тартты.