InfoHub Logo

Алматы қаласының Түрксіб ауданындағы жаңа құрылыстар, көгалдандыру және инфрақұрылымды дамыту жоспарлары туралы аудан әкімі Дамир Акежанов баяндады. Ауданда ескі үйлер сүріліп, аулалар абаттандырылып, жаңа қоғамдық орындар ашылуда.

Бұл туралы Infohub.kz ақпарат агенттігі хабарлайды.

Ескі тұрғын үйлерді жаңарту

Түрксіб ауданында ескі үйлердің саны бойынша қалада көшбасшы болып саналады. Мұнда 582 ескі үй бар, бұл қаладағы барлық ескі үйлердің жартысына жуығын құрайды. Ауданда реновация бағдарламасы арқылы бұл мәселе кезең-кезеңімен шешілуде. Қазіргі таңда жеті учаскеде реновация жұмыстары жүріп жатыр. Оның аясында 34 ескі үй сүріліп, 17 жаңа үй салынды. 590-нан астам меншік иесі жаңа баспанаға ие болды. Алдағы уақытта тағы 175 көпқабатты үй, яғни 5000-нан астам пәтер салу жоспарланған. Бұл жобалар аясында 155-тен астам ескі үй жаңартылады.

Аулаларды абаттандыру және қоғамдық орындар

Сонымен қатар, аулаларды абаттандыру жұмыстары да қарқынды жүргізілуде. 2026 жылы 25 аула жаңартылып, Жұлдыз-1 ықшам ауданында тағы 20 аула толықтай жөнделеді. «Халық қатысуымен бюджет» бағдарламасы аясында биыл 24 жоба жүзеге асырылады. Ауданда 2022-2025 жылдары сегіз қоғамдық орын, соның ішінде жаяу жүргіншілер және серуендеу аймақтары құрылды. Жұмыстар жалғаса береді. 2026 жылы Майбороды көшесінде жаяу жүргіншілер аймағы, Баум тоғайын абаттандыру, Үлкен Алматы каналын жағалауы мен жағажайларымен бірге күрделі жөндеу, сондай-ақ Аэропорт көлін тазартып, жағалауымен, көпірлерімен, веложолдарымен және бақылау алаңдарымен жабдықтау жоспарланған.

Көгалдандыру және экология

Түрксіб ауданы Алматыдағы ең жасыл аудандардың бірі болып қала береді. Мұнда 772,5 мыңнан астам ағаш, 63 жасыл аймақ, оның ішінде бес саябақ пен Баум тоғайы, сондай-ақ 15 гүлзар бар. Биыл 45,6 мың бұта мен 580 ірі ағаш отырғызу, 20 мың ағашты санитарлық, бес мыңға жуық ағашты формативті кесу жоспарланған. Бес көшеде өсімдіктер отырғызылып, автосуарту жүйелері орнатылатын буферлік аймақтар да абаттандырылады.

Инфрақұрылымды жаңғырту

2026 жылы арық жүйесін жаңғырту жұмыстары жалғасады. Жеті учаскеде 1,8 км жаңа арық салынып, 18 учаскеде 900 метр арық жөнделеді. Бұл жаңбырлы күндері су басу қаупін азайтуға көмектеседі.

Аудан әкімінің айтуынша, 2026 жылдың бірінші тоқсанының қорытындысы бойынша аудан тұрақты даму қарқынын сақтап отыр. Жыл соңына дейін негізгі жобаларды аяқтап, қалалық ортаны жаңартуды және реновация бағдарламасын жалғастыру жоспарланған.