InfoHub Logo

Алматыдағы Достық даңғылының жөндеу жұмыстары тұрғындардың наразылығын тудырды. Желіде тараған суреттерде жаңадан төселген плиткалардың шөгіп кеткені байқалады.

Бұл туралы Infohub.kz ақпарат агенттігі хабарлайды.

Не болды?

Әлеуметтік желілерде Алматының Достық даңғылында жүргізілген жөндеу жұмыстарының нәтижелері туралы суреттер жарияланды. Жаңадан төселген плиткалардың шөгіп кеткені тұрғындардың ашуын келтірді.

Желі қолданушылары өз пікірлерін білдіріп, жөндеу жұмыстарының сапасына наразылықтарын жеткізді:

"Төрт ай бойы қазып, соңында қалай болса солай жауып тастады. Трамбовка жасалмады. Соңғы күндері екі жұмысшы ғана көрінді."

"Өткен жылы Достықты жарты жыл бойы қинады - тұрақ жоқ, тәулік бойы кептеліс. Осындай үшін бе?"

"Бұл ең масқара жөндеу, жаздан бері созылып келеді. Масқара!"

Алматы әкімдігінің жауабы

Алматы әкімдігі тұрғындардың наразылығына жауап беріп, тротуар плиткаларының шөгуі уақытша екенін мәлімдеді.

"Достық даңғылында абаттандыру жобасы жүзеге асырылуда, құрылыс-монтаж жұмыстары 2026 жылдың мамыр айына дейін аяқталады. Подрядчик ірі ағаштарды отырғызу үшін шұңқырларды дайындады. Жер жұмыстары мен жаңа топырақтың табиғи шөгуі нәтижесінде тротуар жабындысының уақытша шөгуі тіркелді", - деп хабарлады қалалық әкімдік.

Әкімдік 2025 жылдың 5 желтоқсанынан бастап қалпына келтіру жұмыстары жүргізіліп жатқанын атап өтті.

"Жұмыстар технологиялық нормалар мен топырақ тығыздау процестерін ескере отырып, кезең-кезеңімен жүргізілуде", - деді баспасөз қызметі.

Жергілікті атқарушы орган жабындыны нормативтік жағдайға келтіру жұмыстары толық аяқталғанға дейін жалғасатынын және белгіленген мерзімде аяқталатынын айтты.

Еске салайық, Достық даңғылының реконструкциясы жобасы 2025 жылы басталған болатын. Жоба құны 2,14 миллиард теңгені құрайды және ол жалпы абаттандырудан басқа, кеңейтілген тротуарлар, 3630 шаршы метр велосипед жолдары, көгалдандыру, заманауи материалдармен жол бөлігін қайта құру, жаңа электр желілеріне қосылу, шағын сәулет формаларын орнату, жаңа жаяу жүргіншілер өткелдері мен бағдаршамдарды қамтиды.