InfoHub Logo

Ақтау қаласында кейбір тұрғындар қоқыс шығару қызметі үшін бірден бірнеше айға арналған төлем шоттарын алды. Бұл жағдай тұрғындар арасында түсініспеушілік тудырды. Мәселеге қатысты «Zero Waste Ақтау» компаниясы түсініктеме берді.

Бұл туралы Infohub.kz ақпарат агенттігі хабарлайды.

Төлемдерді кім жүзеге асырады?

«Zero Waste Ақтау» компаниясының мәліметінше, олар қала аумағында орталықтандырылған қоқыс жинау жүйесі бойынша қоқыс жинау және тасымалдау қызметтерін заңды түрде тек олар ғана көрсетеді. Компания 1 қаңтардан бастап қызмет көрсете бастағанымен, бұған дейін «West Recycling Company», «Мұнайлы-Қызмет», «Евросервис ДжО», «Атамекен Тазалық», «Соцсервис-А» және «Caspiy Operating Aktau» сияқты басқа да компаниялар тұрғындарға төлем шоттарын ұсынып, ақшалай қаражат қабылдап келген.

Қала прокуратурасының тексеру шаралары кезінде қоқыс төлемдері бойынша шоттарды беру уақытша тоқтатылған болатын. Алайда, «Zero Waste Ақтау» компаниясы қоқыс жинау және тасымалдау қызметтерін толық көлемде көрсетуді жалғастырған.

Тұрғындар не істеуі керек?

Ендігі уақытта қоқыс жинау және тасымалдау қызметтері үшін төлемдер тек «Zero Waste Ақтау» компаниясының шотына ғана жүргізілуі тиіс. Егер тұрғындар осы айлар ішінде басқа компанияларға қоқыс шығару үшін ақша аударған болса, онда ақшаны қайтару үшін тиісті компанияларға жазбаша өтініш беру қажет.

Тарифтер қандай?

Қалалық мәслихаттың 2022 жылғы 4 қазандағы шешімімен бекітілген тариф бойынша, қоқыс жинау, тасымалдау, сұрыптау және көму қызметтеріне бір тұрғынға айына 450 теңге (ҚҚС-сыз) болады. 1 қазаннан бастап Қазақстан Республикасының салық заңнамасына сәйкес 16% ҚҚС қосылғанда, тариф бір тұрғынға айына 522 теңгеге теңеседі.