InfoHub Logo

Атыраудағы психиатриялық диспансердің ескі ғимараттары апатты деп танылған соң, оны көшіру мәселесі көтерілді. Жаңа медициналық орталықты Алмалы ауылында салу жоспарлануда.

Бұл туралы Infohub.kz ақпарат агенттігі хабарлайды.

Ескі ғимараттардың жағдайы

Қазіргі диспансер 1938, 1973, 1978 және 1984 жылдары салынған бірнеше бір қабатты ғимараттан тұрады. Бұл құрылыстар 2021 жылы апатты деп танылғанымен, әлі күнге дейін 107 науқасқа арналып, стационарлық ем көрсетілуде.

Жаңа құрылыс жобаларының тарихы

Жаңа психиатриялық диспансер салу әрекеттері бұған дейін де бірнеше рет жасалған. 2008-2010 жылдары Agip KCO компаниясының демеушілігімен жобалық-сметалық құжаттама әзірленіп, сараптамадан өткен. Алайда, жоба неге жүзеге аспағаны белгісіз.

2017 жылы NCOC компаниясының көмегімен құжаттама қайта жасалды. Бірақ бұл жолы жер учаскесін су қорғау аймақтарымен келіспегендіктен, сараптамадан өтпеді.

Қазіргі жағдай және болашақ жоспарлар

2021 жылы облыстық бюджет есебінен 250 орындық Психикалық денсаулық орталығын салуға 37,4 млн теңге бөлінді. Жаңа жобалық-сметалық құжаттаманы «Әсем жоба құрылыс» ЖШС дайындап, қазіргі таңда инженерлік желілермен келісу рәсімі жүріп жатыр. Одан кейін жоба мемлекеттік сараптамаға жіберіледі.

Жаңа орталықты салу үшін 7,5 гектар жер учаскесі Атырау маңындағы Алмалы ауылынан бөлінді.