InfoHub Logo

Қазақстанда вице-президент қызметі қайта енгізіледі деген жаңалық елде қызу талқылау тудырды. Осыған орай, экс-президент Нұрсұлтан Назарбаевтың үлкен қызы Дариға Назарбаеваның саясатқа оралып, бұл қызметке келуі мүмкін деген болжамдар әлеуметтік желіде тарауда. Аталған мәселеге қатысты Мәжіліс депутаттары пікір білдірді.

Бұл туралы Infohub.kz ақпарат агенттігі хабарлайды.

Депутаттардың жауабы

Мәжіліс дәлізінде журналистердің сауалына жауап берген депутат Абзал Құспан әлеуметтік желідегі пікірлердің алуан түрлі екенін атап өтті. Оның айтуынша, ол мұндай болжамдарға қатысты ешқандай нұсқаны растамайды және жоққа шығармайды. "Шынымды айтайын, менде үміткерге қатысты ешқандай нұсқа жоқ. Дәл сол айтылған кісі лайықты деп ойламаймын", - деді ол.

Өз кезегінде, депутат Айдос Сарым Дариға Назарбаеваны "сүйкімсіз саясаткер" деп атап, оның дәуірі әлдеқашан өтіп кеткенін жеткізді.

Вице-президент институты

Айта кетейік, 20 мамырда Парламент "Президент туралы" конституциялық заңды екінші оқылымда қабылдады. Бұл заң бойынша Қазақстан Республикасының вице-президенті институты енгізіліп, оның құқықтық жағдайы айқындалады. Мемлекет басшысының тапсырмасымен вице-президент Құрылтаймен, Үкіметпен және өзге де мемлекеттік органдармен өзара іс-әрекет жасайтын болады.

Дариға Назарбаева 2022 жылдың 25 ақпанында Мәжіліс депутаты ретінде өкілеттігін тоқтатқан болатын. Содан бері ол қоғамдық-саяси өмірден белсенді түрде көрінбей, көпшілік назарынан тыс қалды.