InfoHub Logo

Қазақ мәдениеті әлемге танылуда. Бұл жолы Чили тұрғыны Мария Муньос домбырада шебер ойнап, қазақ әндерін шырқап, көпшілікті таң қалдырды. Ол Қазақстанда тумаса да, домбыраны меңгеріп, қазақ әндерін орындауға деген құштарлығын интернет арқылы жүзеге асырды.

Бұл туралы Infohub.kz ақпарат агенттігі хабарлайды.

Ізгілік іздері

Мария Муньос домбыраны алғаш рет Димаш Құдайбергеннің орындауында көріп, қызығушылық танытқан. Ол Димаштың домбырада ойнағанын көріп, қазақ мәдениетімен тереңірек танысуға бел буды. «Димаш арқылы домбыраға әуес болдым. Ол өте талантты, осы әлеммен таныстырғаны үшін рахмет!» дейді ол.

Екі жылдық ізденіс

Мария екі жыл бойы домбыраны өз бетінше үйреніп келеді. YouTube арқылы бейнесабақтар көріп, құлаққа салып үйренеді. Ол домбырада ойнаудың қиындығын мойындайды, әсіресе, бұрын-соңды бұл аспапты ұстамаған адам үшін. Күнделікті жаттығулар бірнеше сағатқа созылып, саусақтарында ізін қалдырады. «Мен YouTube-тегі бейнелерді көріп, құлаққа салып үйренемін. Домбырада ойнау – бұл аспаппен таныс емес адамдар үшін қиын. Dombyra Soft бағдарламасын да қолданамын», – дейді Мария.

Жүректі тербейтін әндер

Марияның репертуарынан Ақан Серінің атақты «Балқадиша» әні де орын алған. Бұл әнді орындау оған үлкен сынақ болды. «Бұл әнді бірнеше ай бойы көз жасымды бәсеңдете алмай айттым. Бұл әннің тарихындағы терең қайғыны сезіндім. Орындау оңай болмады, бірақ бұл ән соншалықты әдемі болғандықтан, мен оны міндетті түрде айтуым керек еді», – деп бөлісті ол.

Сонымен қатар, Марияның орындауында Димаш Құдайбергеннің «Самалтау» және «Қараторғай» әндері, «МузАрт» тобының «Үшқоңыр» композициясы, «Көңіл толқыны» күйі және басқа да туындылар бар.

Желідегі әсер

Марияның бейнежазбалары астында жүздеген пікірлер қалдырылған. Олардың қатарында қазақстандықтардан бөлек, басқа да елдердің өкілдері бар. «Нағыз қазақша ойнайсың, жаныңды салып ойнайсың!», «Қандай керемет орындау! Рахмет, Мария ханым», «Браво! Брависимо!», «Талабыңа нұр жаусын, Димаш фан-клубының үздік өкілісің!» – деп жазады көрермендер.

Марияның өзі айтқандай, ол әндерді танымалдылық үшін емес, музыканы, сөздерін және әр әннің тарихын сүйгендіктен жазады. «Менің жұмысымды адамдар жақсы көреді, олар әрқашан жақсы пікірлер қалдырып, мені жалғастыруға шақырады. Мен өзімді шынымен бақытты сезінемін», – дейді ол.

Қазақстанмен байланыс

Қазақ мәдениетін зерттеу барысында Марияның Қазақстанда көптеген достары пайда болды. Олар Атыраудағы домбыра академиясының шәкірттері мен ұстаздары, сондай-ақ Марияға арнап домбыра жасаған шебер Ерасыл Әділбеков. «Уақыт айырмашылығына байланысты жиі сөйлесе алмаймыз, бірақ әрдайым байланыстамыз. Қазақстанға және қазақтар үшін қасиеттінің бәріне деген терең құрмет пен сүйіспеншілік біздің қарым-қатынасымыздың негізі», – дейді ол.

Ол тіпті қазақстандық оқушылармен бейнебайланыс арқылы сөйлесіп, бірге жаттығады.

Қазақстанға саяхат – арманы

Мария әлі Қазақстанда болмаған, бірақ саяхат жоспарын жасап қойған. Оның тізімінде Астана мен Алматы ғана емес, басқа да қалалар бар. «Өкінішке орай, мен Қазақстанда болған емеспін. Бірақ мен көптеген тарихи орындарды, мұражайларды, сондай-ақ ұлттық саябақтар мен Алматы, Астана, Қызылорда және Қатонқарағай сияқты қалаларды аралағым келеді», – деп бөлісті ол.

Әзірге ол қазақ мәдениетін зерттеуді жалғастыруда, нағыз музыка мен дәстүрге деген құрметтің шекарасы жоқ екенін дәлелдеп келеді.