InfoHub Logo

Батыс Қазақстан облысындағы Жалпақтал ауылында 30 метрлік Ейфель мұнарасының көшірмесі пайда болды. Бұл туындыны туған ауылына жергілікті мектептің 2006 жылғы түлектері сыйға тартты.

Бұл туралы Infohub.kz ақпарат агенттігі хабарлайды.

«Ынтымақ» – жаңа жергілікті көрікті орын

Жаңа мұнара «Ынтымақ» деп аталды. Биіктігі 30 метрден асатын құрылысқа шамамен 45 миллион теңге жұмсалды.

Жалпақтал ауылында мұндай дәстүр бұрыннан бар. Мектеп бітірген түлектер әр жылдары туған жерлеріне әртүрлі сыйлықтар жасап келеді. Осы уақыт ішінде ауылда саябақтар, спорт алаңдары, субұрқақтар, кіреберістегі арка, мүсіндер бой көтерген.

Өткен жылы түлектер 40 миллион теңгеге спорт кешенін салдырған болатын. Енді міне, өздерінің Ейфель мұнарасы да бар.

«Ауыл – қазақ үшін тамыр іспеттес»

Жоба әлеуметтік желілерде қызу талқыға түсті. Кейбір қолданушылар бұл идеяны тамашалап, мұнара туристерді тартады деп есептесе, енді біреулері бұл ақшаны әлдеқайда пайдалы нәрселерге жұмсауға болатынын айтты.

Желідегілер мұнара айналасына саябақ, жазғы кафе және мерекелік іс-шаралар өткізуге арналған алаң жасауды ұсынып жатыр.

«Қазақ үшін ауыл – жай ғана картадағы нүкте емес. Ол – тамыр. Сен қайдан шыққаныңды, өміріңнің бастауын білдіретін жер», – деп жазды әлеуметтік желі қолданушылары.

Кеш батқанда мұнара жарықпен безендіріліп, қазіргі таңда өңірдегі ең көп талқыланатын көрікті орындардың біріне айналды.