InfoHub Logo

Саяси сахнадан белгілі бір уақытқа алыстаған Иманғали Тасмағамбетовтің айналасындағы сыбыс-сыбырлар тыйылар емес. Белгілі журналист Бигелді Ғабдуллин осы жағдайға қатысты өз ойын білдіріп, оның себептерін ашып көрсетті.

Бұл туралы Infohub.kz ақпарат агенттігі хабарлайды.

Тасмағамбетовке қарсы науқанның себебі неде?

Ғабдуллиннің айтуынша, Тасмағамбетовке қарсы жүргізіліп жатқан ақпараттық науқанның негізгі себебі – оның ел алдындағы беделі мен тұлғасынан қорқатын бақталастарының қызғанышы мен үрейі.

Оны билік үшін қауіпті қарсылас ретінде көретіндер, кез келген мүмкіндікті пайдаланып, оның абыройына кір келтіруге тырысады.

«Иманғалидың есімін ел жадынан ешкім өшіре алмайды. Оның саяси аренаға қайта оралуы кейбір жартыкеш саясаткерлерді қатты шошытады. Олар әлі күнге дейін Тасмағамбетовті көре алмай келеді», – дейді журналист.

Шаңырақ оқиғасы – саяси ойынның құралы

Журналисттің пікірінше, Тасмағамбетовке қарсы жиі қолданылатын аргументтердің бірі – Шаңырақ оқиғасы. Алайда, Ғабдуллин бұл жағдайда Иманғалиді кінәлауды негізсіз деп санайды.

«Шаңырақ оқиғасына Имекеңнің қандай қатысы бар? Үйлерді бұзуға бұйрық беретін әкім емес, жоғары тұрған орган екені белгілі. Алматы халқы жақсы біледі, Шаңырақтағы жерді заңсыз үлестірген парақор шенеуніктер болған. Иманғали келіп, бұл жүйені тазалай бастағанда, осы схемадан пайда тапқандар оған қарсы арандату ұйымдастырды», – деп жазды Ғабдуллин.

Компромат жинау әрекеттері

Ғабдуллин экс-президенттің тұсында билікте болған кез келген адамға қатысты компромат жиналатынын еске салды. Оның айтуынша, Рахат Әлиевтің Тасмағамбетовке қарсы компромат жинауда белсенді болғаны айтылады.

«Әлиев Иманғалидың атын естісе, қатты шошитын болған. Ол Тасмағамбетовтің жолын кесу үшін қолынан келгеннің бәрін істеді. Сенбесеңіз, Қаңтардан кейінгі полковник Мұхтар Қарабековтың сұхбатын қараңыз. Самат Әбіш пен Дариға Назарбаева одан Тасмағамбетовке қарсы жалған куәлік беруді талап еткен. Қарабеков төрт жыл бойы ҰҚК жертөлесінде отырса да, жалған құжатқа қол қоймады», – деп жазды автор.

Сондай-ақ, Тасмағамбетов ҰҚШҰ хатшысы қызметін атқарған кезінде де оған қарсы жағымсыз ақпараттық науқан жүргізілгені айтылады. Оның «Ивангали» деген лақап атпен халыққа жағымсыз кейіпкер ретінде көрсетуге тырысқан.