InfoHub Logo

1994 жылы қазан айында Жоғары Кеңес Әкежан Қажыгелдиннің премьер-министрлігін мақұлдады. Алайда, оның орынбасары болуға ұсынылған Алтынбек Сәрсенбайұлына депутат Алтыншаш Жағанова қарсылық білдіріп, тіпті президенттің өзінің бетін қайтарды. Бұл жайында "Қилы кезең" деректі фильмінің 12-бөлімінде айтылған.

Бұл туралы Infohub.kz ақпарат агенттігі хабарлайды.

Депутаттың наразылығы

Алтыншаш Жағанова Жоғары Кеңес мінберінен сөйлегенде, «Бұл жолы президент қателесті» деп мәлімдеді. Ол Нұрсұлтан Назарбаевтың Алтынбек Сәрсенбайұлының кандидатурасын қолдағанына қарамастан, бұл шешім дұрыс емес деп есептеді.

Сәрсенбайұлының жауабы

Алтынбек Сәрсенбайұлы бұл сөздерге жауап ретінде болашақта сөз бостандығына кепілдік беретін Конституцияның өзі жеткілікті болатынын, тіпті баспасөз туралы заңның қажеті болмай қалуы мүмкін екенін айтты. Алайда, уақыт өте келе БАҚ туралы заң өз күшінде қалды.

Неге қарсы болды?

Кейіннен Алтыншаш Жағанова бұл жайтқа қатысты пікірін білдіріп, президенттің ренжігенін айтты. Депутаттың айтуынша, Алтынбек Сәрсенбайұлының бұрынғы тәртібі мен қалалық кеңестегі жұмысы кезіндегі мінезі оған ұнамаған. «Меніңше, оның принциптері басқаша болатын. Маған ұнамайтын әйтеуір», - деді ол.

Өз кезегінде Алтынбек Сәрсенбайұлы бұл жағдайға ризашылығын білдірді. Ол өзінің премьер-орынбасар болмағанына шүкірлік етіп, сол кездегі вице-премьердің басқаруымен әлеуметтік саланың күйрегенін айтты. «Мені сол жолы Құдай сақтады. Әлі күнге сол апайымызды көрсем, рақмет айтқым келеді», - деді ол.