InfoHub Logo

Қазақстанның аграрлық секторындағы кадр тапшылығы мен ет бағасының өсуіне байланысты үкімет малшылар мен ветеринарлардың жалақысын көтеруді жоспарлап отыр. Бұл шаралар сала мамандарының беделін арттырып, еңбек өнімділігін жоғарылатуға бағытталған.

Бұл туралы Infohub.kz ақпарат агенттігі хабарлайды.

Малшылар мен шопандардың еңбегі бағаланады

Көшпелі мал шаруашылығындағы бақташылар мен шопандардың еңбегі «зиянды еңбек жағдайы» ретінде танылып, олардың жалақысының бір бөлігі бюджеттен өтелетін болады. Бұл туралы вице-премьер – ұлттық экономика министрі Серік Жұманғарин мәлімдеді. Оның айтуынша, «Мал шаруашылығын дамытудың 2026–2030 жылдарға арналған кешенді жоспары» аясында сала қызметкерлерін әлеуметтік қорғауды арттыру шаралары қарастырылған.

Егер бұл бастама іске асса, малшылар 55 жастан асқан соң ерте зейнетке шығып, арнаулы әлеуметтік төлем ала алады. Бұл төлем 2024 жылдан бастап енгізілген және орташа есеппен 200 мың теңгеден асады. Төлем алу үшін 7 жылдық кәсіптік зейнетақы аударымдары мен 55 жасқа толу талап етіледі.

Ветеринарлардың жалақысы еселенеді

Аграрлық сектордың тағы бір маңызды буыны – ветеринария саласы. Мал дәрігерлерінің жалақысын көтеруге 2023–2025 жылдары 29,6 млрд теңге, ал 2026–2028 жылдары жыл сайын 12,2 млрд теңге бөлу жоспарланған. Нәтижесінде, мал дәрігерлерінің орташа жалақысы 119,7 мыңнан 271,5 мың теңгеге дейін өсті.

Сонымен қатар, ветеринар мамандарына І және ІІ топтағы патогенді биологиялық агенттермен жұмыс істегені үшін қосымша үстемеақылар белгіленді. Ғылым кандидаты немесе докторы дәрежесі бар мамандарға жалақысына қосымша ақы қарастырылады.

Ауыл шаруашылығына мамандар даярлау

Мал шаруашылығына қажетті мамандарды даярлау үшін нысаналы гранттар мен стипендиялар мөлшері ұлғайтылады. 2025/2026 оқу жылында «Ауыл шаруашылығы және биоресурстар» бағыты бойынша 3 018, ал «Ветеринария» бойынша 1 451 грант бөлінді. Ауыл балалары үшін жоғары білімнің қолжетімділігін арттыру мақсатында ауылдық квота 35%-ға дейін ұлғайтылып, ҰБТ-ның шекті балы 50-ге дейін төмендетілді.

Ауыл шаруашылығы мамандықтарында оқитын студенттердің шәкіртақысы 2025 жылдың 1 қыркүйегінен бастап 20%-ға, ал 2020 жылмен салыстырғанда екі есеге ұлғайтылып, 52 372 теңгені құрады. Дегенмен, стипендияны одан әрі көтеру гранттардың игерілуіне әсер етуі мүмкін деген алаңдаушылық та бар.