InfoHub Logo

Қазақстандықтарды медициналық сақтандыру жүйесіндегі жаңа "Qalqan" платформасы қызықтыруы мүмкін. Әлеуметтік медициналық сақтандыру қорының (ӘМСҚ) басшысы Гүлмира Сабденбек бұл жаңа жүйенің не үшін қажет екенін және оның жұмысы туралы толық ақпарат берді.

Бұл туралы Infohub.kz ақпарат агенттігі хабарлайды.

"Qalqan" – жаңа жүйе емес, дамыған инфрақұрылым

ӘМСҚ басшысының айтуынша, "Qalqan" бұрыннан бар жүйелердің үстіне жаңадан қосылатын бөлек жүйе емес. Бұл – Қордың қазіргі цифрлық инфрақұрылымын дамыту және оны Қаржы министрлігі қолданып жүрген заманауи технологиялық платформаға көшіру.

"Бұл платформаны таңдау себебі – онда бұрыннан бар технологиялық шешімдер бар, Қаржы министрлігімен интеграциялау мүмкіндігі кең және жаңа инфрақұрылымсыз қажетті функцияларды тезірек іске асыруға мүмкіндік береді", – деп жазды Гүлмира Сабденбек өзінің әлеуметтік желі парақшасында.

Қосымша шығын болмайды

Платформаны құру үшін қосымша қаржы қажет деген ақпарат шындыққа жанаспайтынын да басшы растады. ""Qalqan" платформасын құру медициналық сақтандыру жүйесі үшін қосымша шығынсыз жүзеге асырылады", – деп атап өтті ол.

"Qalqan" – медициналық жүйе емес

Гүлмира Сабденбектің айтуынша, "Qalqan" – бұл медициналық ақпараттық жүйе емес, Damumed және басқа да медициналық қызметтерді алмастырмайды. Оның негізгі мақсаты – қаржы ағындарының ашықтығын қамтамасыз ету, көрсетілген қызметтерді тексеру және міндетті әлеуметтік медициналық сақтандыру қаражатының тиімді жұмсалуын бақылау.

Бұл платформа операцияларды есепке алудан шығыстарды басқаруға және олардың тиімділігін арттыруға бағытталған цифрландырудың келесі деңгейіне өтуді білдіреді. Жаңа платформа деректерді біріктіріп, есеп айырысулардың ашықтығын арттырып, қаражаттың қозғалысын толық бақылауға мүмкіндік береді.

Әр теңгенің есебі

"Qalqan" платформасының басты міндеті – әрбір төленген қызметтің расталғанын, ал ӘМСҚ-ның әрбір теңгесінің негізделгенін және медициналық көмекке бағытталғанын қамтамасыз ету. Бұл жүйе медицина саласындағы қаржылық ашықтықты арттырып, қаражаттың тиімді пайдаланылуына жағдай жасайды.