InfoHub Logo

Белгілі қазақстандық актриса Меруерт Өтекешева "Қыз Жібек" фильмінің тарихи камзолына қатысты даулы жағдай мен продюсер Баян Мақсатқызының ай сайын 1 миллион теңге төлеу туралы уәдесіне қатысты пікірін білдірді. Бұл туралы Infohub.kz ақпарат агенттігі хабарлайды.

Актрисаның айтуынша, фильм түсірілімі кезінде көптеген костюмдер жоғалғандықтан, ол камзолды іздемегенін айтты. Камзолды киіп көрген Баян Мақсатқызының әрекетіне қатысты пікір білдірген Өтекешева, оның мұны ешкімді ренжіту мақсатында жасамағанын, керісінше, тарихи затқа деген шынайы қызығушылықтан істегенін атап өтті. Камзолдың музейге тапсырылуы мүмкін екенін де айтты.

Меруерт Өтекешева сондай-ақ Баян Мақсатқызының уәде еткен 1 миллион теңгеге қатысты мәселеге тоқталды. Актрисаның сөзінше, әзірге екеуі бұл тақырыпты талқыламаған, бірақ Баян Мақсатқызының шығармашылық адамдарға қолдау көрсету ниетін түсінетінін жеткізді.

Бұған дейін Баян Мақсатқызына "Қыз Жібек" фильмінің аты аңызға айналған камзолы сыйға тартылған болатын. Бұл жағдай әлеуметтік желілерде қызу талқыланып, кейбір азаматтар мұндай құнды жәдігердің жеке адамның қолына түскеніне наразылық білдірсе, енді біреулер оның әсемдігін мақтап, сенімді қолда екенін айтты. Мәдениет министрлігі де бұл мәселеге қатысты тексеру жүргізетінін хабарлаған еді.

Кейіннен Баян Мақсатқызы камзолға қатысты дауларға байланысты жаңа мәлімдеме жасап, актрисаға сыйлық ретінде тон беретінін және оған ай сайын 1 миллион теңге көлемінде «өмір бойы ризашылық» төлейтінін айтты.