InfoHub Logo

Орал қаласында 8 жастағы Артем есімді баланың ауладан ауыр күйік жарақатымен тауып алынып, кейін қайтыс болуы жұртшылықты дүрліктірді. Бұл қайғылы оқиға 2025 жылдың 10 тамызында болған.

Бұл туралы Infohub.kz ақпарат агенттігі хабарлайды.

Оқиғаның мән-жайы

Жазғы демалысын әжесінің үйінде өткізіп жүрген Артем сол күні достарымен серуендеуге шыққан. Арада бірнеше сағат өткен соң, оны ауыр күйік алған күйде үйіне жеткізген. Баланың анасы Мұхаббат Пардаеваның айтуынша, Артем есін жоғалтпаса да, өзіне не болғанын толық түсіндіре алмаған. Ол тек өзін өлтірмек болғандарын бірнеше рет қайталаған.

Дәрігерлер баланың денесінің 96 пайызы күйіп қалғанын анықтап, көп ұзамай Артем алған жарақаттарының салдарынан көз жұмды.

Тергеуге наразылық

Ананың сөзінше, қылмыстық іс 2026 жылдың ақпан айында тоқтатылған. Ол тергеу барысында маңызды дәлелдердің бір бөлігін отбасының өз күшімен жинауға мәжбүр болғанын айтады. Мұхаббат Пардаева мектеп пен дүкендердегі бейнебақылау камераларының жазбаларын өзі іздеп тапқанын жеткізді. Алайда, подъездердегі бейнебақылау жүйелері жазбаларды небәрі жеті күн ғана сақтайтыны белгілі болған. Полиция бұл уақыт ішінде қажетті материалдарды үлгеріп ала алмағандықтан, оқиғаның мән-жайын анықтауға көмектесетін маңызды бейнежазбалар жоғалып кеткен.

«Іс жүзінде бұл іспен ешкім айналыспағандай әсер қалды. Бізге бейнежазбалардың тек жекелеген үзінділері ғана көрсетілді. Ал ең маңызды сәттер түсірілген кадрлар сақталмаған. Менің ойымша, тергеу тиісті деңгейде жүргізілген жоқ», – дейді Мұхаббат Пардаева.

Полицияның жауабы

Отбасының болжамы бойынша, оқиғаға кәмелетке толмаған балалардың қатысы болуы мүмкін. Алайда, осы уақытқа дейін ешкім жауапкершілікке тартылмаған. Әділдікке қол жеткізу үшін барлық заңды мүмкіндіктерді пайдаланғаннан кейін, марқұм баланың әкесі әлеуметтік желі арқылы видеоүндеу жариялап, кінәлілерді анықтауға көмектесуді сұраған. Кейін оның өзіне қатысты арыздар түсіп, отбасы адвокаттың көмегіне жүгінуге мәжбүр болды.

«Ақырында бәрі өзімізге қарсы бағытталғандай болды. Күйеуімнің ешкімге қоқан-лоқы көрсетпегенін дәлелдеуге тура келді», – дейді баланың анасы.

Қазір Артемнің ата-анасы Орал қаласына тек ұлдарының зиратына зиярат ету үшін ғана келетіндерін айтады. Ал Батыс Қазақстан облыстық Полиция департаменті іс бойынша барлық қажетті сараптамалар жүргізілгенін мәлімдеді. Ведомствоның хабарлауынша, қылмыстық іс Қазақстан Республикасы Қылмыстық-процестік кодексінің 35-бабы 1-бөлігі 2-тармағына сәйкес, яғни әрекетте қылмыстық құқық бұзушылық құрамының болмауына байланысты тоқтатылған.