InfoHub Logo

Пойыз жолаушысының басынан кешкен жағымсыз оқиғаға байланысты тасымалдаушы компания сотта жеңіліп, 3 миллион теңге төлеуге мәжбүр болды. Бұл жағдай Астана-Петропавл бағытындағы пойыздың дәретханасында орын алған.

Бұл туралы Infohub.kz ақпарат агенттігі хабарлайды.

Дәретханадағы апат

Биылғы жылдың 7 наурызында Астанадан Петропавлға қарай бет алған пойыздың дәретханасында күтпеген техникалық ақау туындаған. Салдарынан кәріз жүйесінен шыққан лас су сыртқа атқылап, жақын маңдағы жолаушының үстіне шашыраған.

Бұл оқиға жолаушыға ауыр физикалық және моральдық әсер еткен. Оның киімі мен жеке заттары да бүлінген. Ол бұл жағдайдан кейін қатты күйзеліске ұшырап, психологиялық тұрғыдан қиналғанын айтты.

Сот шешімі

Жолаушы тасымалдаушы компаниядан моральдық шығын мен билет құнын өндіріп беруді талап етіп, сотқа арызданған. Іс материалдарында көліктік бақылау инспекциясының тексеру қорытындылары, оқиғаның фотодәлелдері және тасымалдаушыға қатысты әкімшілік хаттама да болған.

Сот қызметтің сапасыз көрсетілгенін растап, «Тұтынушылардың құқықтарын қорғау туралы» заңға сүйене отырып, жолаушының талап-арызын ішінара қанағаттандырды. Нәтижесінде, пойыз компаниясы жолаушының пайдасына 3 миллион теңге көлемінде моральдық өтемақы төлеуге міндеттелді.