InfoHub Logo

Қазақстан ақпан айында ауа райының күрт құбылмалылығын бастан кешті. Бірде аномалды жылылық байқалса, енді бірде қалың қар мен боран соғып, көптеген аймақта температура рекорды жаңартылды. Елді мекендердің көбінде ауа температурасы климаттық нормадан 1-6 градусқа жоғарылап, жауын-шашын мөлшері әдеттегіден едәуір асты, деп хабарлайды Infohub.kz.

Аномалды жауын-шашын

Ақпанның басында Қазақстан аумағына белсенді циклон еніп, атмосфералық фронттардың өтуіне байланысты қарлы жауын-шашын жиіледі. Мәселен, 6 ақпанда Астанада бір күнде 23 мм жауын-шашын тіркелді. Бұл айлық норманың (17 мм) 135%-дан асып түскенін көрсетеді. Түркістан облысында 9-10 ақпан аралығында Ақсай станциясында 91 мм жауын-шашын жауып, бұл айлық нормадан (74 мм) 23%-ға артық. Абай облысында да 19 ақпанда 15 мм жауын-шашын тіркелді, бұл нормадан (7 мм) екі есе көп.

Жылылық рекордтары

Айдың басында елдің оңтүстік және шығыс өңірлеріне оңтүстіктен жылы ауа массаларының енуі салдарынан жаңа температура рекордтары орнатылды. Мәселен, 2 ақпанда Шымкентте +15,6 градус жылылық тіркеліп, 2021 жылғы рекордты (+14,5 градус) жаңартты. 4 ақпанда Қызылордада +13,4 градус, Түркістанда +17,5 градус жылылық байқалды. Павлодарда 6 ақпанда температура +2,8 градусқа, ал Өскеменде +4,7 градусқа дейін көтеріліп, бұл да жаңа максимумдар болды.

Ақпанның екінші онкүндігінде де рекордтар жалғасты. 14 ақпанда Ақтауда температура +17,2 градусқа жетіп, 2024 жылғы рекордты (+14,1 градус) жаңартты. 17-18 ақпанда Ақтаудағы температура +11,4 градус болды, бұл 1978 жылғы көрсеткіштен жоғары. Сондай-ақ, 18 ақпанда Павлодарда (+3,4 градус), Семейде (+5,6 градус) және Көкшетауда (+0,8 градус) бұрынғы температура рекордтары жаңартылды.

19 ақпанда Алматыда тарихи максимум орнатылды – +23,6 градус. Бұл 1859 жылдан бергі барлық бақылау тарихындағы рекорд болды.

Аязды антициклон айды қорытындылады

Ақпанның үшінші онкүндігінде Қазақстан аумағына суық антициклон еніп, жауын-шашынсыз аязды ауа райы орнады. Елдің солтүстік және шығыс өңірлерінде температура -30...-39 градусқа дейін төмендеді. Алайда, ең төменгі температура бойынша абсолюттік рекордтар тіркелген жоқ.

Ақпан айының қорытындысы

Жалпы, синоптиктердің айтуынша, 2026 жылғы ақпан Қазақстанда аномалды жылылық пен қатты аязды қатар алып келген ауа райының жоғары өзгерушілігімен ерекшеленді. Жауын-шашын нормадан 1,3-6 есе артық жауып, температураның ауытқуы айтарлықтай болды. Астанада айдың орташа температурасы -11,4 градус болды, бұл нормадан 2,2 градусқа жоғары. Ең жоғары температура 18 ақпанда (+2,1 градус), ең төменгі температура 27 ақпанда (-28,7 градус) тіркелді.