InfoHub Logo

Қазақстанда 17 наурыздан бастап қалалық және аудандық әскерге шақыру комиссиялары жұмысын бастады. Олар әкім орынбасарларының төрағалығымен мерзімді әскери қызметке азаматтарды шақыруды жүзеге асырады. Биыл көктемде қанша адам әскерге алынатыны және олардың қайда жіберілетіні туралы Қорғаныс министрлігі мәлімет берді.

Бұл туралы Infohub.kz ақпарат агенттігі хабарлайды.

Әскерге шақырылушылар саны мен бөлінуі

Қарулы Күштер Бас штабының ұйымдастыру-жұмылдыру жұмыстары департаментінің бастығы Алмас Исабековтің айтуынша, 30 маусымға дейін 18-27 жас аралығындағы 21 мың азаматты әскерге шақыру жоспарланған.

Оның ішінде 11 мыңнан астам адам Қарулы Күштерге, 7 мыңнан астамы Ұлттық ұланға, 2 мың адам ҰҚК Шекара қызметіне, шамамен 400-і Төтенше жағдайлар министрлігіне және 300-і Мемлекеттік күзет қызметіне жіберіледі.

Шақыру қағаздары қалай келеді?

Азаматтарға шақыру қағаздары SMS хабарламалар және eGov порталындағы хабарламалар арқылы, келу күніне дейін кемінде үш күн бұрын жіберіледі. Мұндай хабарлама ресми болып саналады және оны алған азамат әскери комиссариатқа немесе шақыру пунктіне келуге міндетті.

Дәлелді себепсіз келмеген жағдайда заң бойынша жауапкершілік қарастырылған. Жағдайларға байланысты азаматқа әкімшілік ықпал ету шаралары қолданылуы мүмкін, ал әдейі шақырудан жалтарған жағдайда қылмыстық жауапкершілікке тартылады.

Әскерге шақырылушыларға қолдау шаралары

Қорғаныс министрлігі шақырылушыларға көрсетілетін қолдау шаралары туралы да еске салды. Атап айтқанда, оларға несие каникулдары және ҰБТ нәтижелеріне қарамастан жоғары оқу орындарына мемлекеттік білім гранттарына түсу мүмкіндігі беріледі. Сонымен қатар, қызмет кезінде сарбаздар Қарулы Күштер түрлерінің кіші мамандарды даярлау оқу орталықтарында жұмысшы мамандықтарын ала алады.

Бұған дейін Президент Тоқаев мерзімді әскери қызметін өтеген әскери қызметшілерді запасқа шығару және 2026 жылдың наурыз-маусым және қыркүйек-желтоқсан айларында азаматтарды мерзімді әскери қызметке кезекті шақыру туралы Жарлыққа қол қойған болатын.