InfoHub Logo

Қазақстан Парламенті Сенаты туризмді қолдау және балалар спортын дамыту бағытында заңнамаға маңызды өзгерістер енгізуді ұсынды. Жаңа ережелерге сәйкес, елімізде жаңа ойын-сауық аймақтары ашылады. Алайда, бұл жаңалықтың ерекшелігі – онда тек шетелдік азаматтар ғана ойнай алады.

Бұл туралы Infohub.kz ақпарат агенттігі хабарлайды.

Жаңа ойын аймақтарының ашылуы

Сенатор Амангелді Есбайдың айтуынша, заң жобасы бойынша ойын бизнесін орналастыруға рұқсат етілген аумақтардың тізімі кеңейтіледі. Бұған дейін тек Бурабай мен Қапшағайда ғана рұқсат етілген болса, енді Маңғыстау, Жетісу, Алматы және Шығыс Қазақстан облыстарында да жаңа ойын аймақтары пайда болуы мүмкін.

«Бұл жаңа аумақтардағы ойын мекемелеріне тек шетелдік азаматтардың кіруіне ғана рұқсат етіледі. Бұл – маңызды шектеу болып табылады», - деді депутат.

Туризм саласын дамыту

Заңнамаға енгізілетін өзгерістер туризм саласын дамытуға да бағытталған. Визит-центрлер туристік нысандар ретінде заңды мәртебеге ие болады. Оларды туристік бағыттарға орналастыру, сондай-ақ құрылыс, реконструкция және жабдықтау тәртібі айқындалады. Бұдан бөлек, халықаралық тұрақты емес жолаушылар тасымалын ұйымдастыратын туроператорларға арналған құжаттарды ресімдеу және мемлекеттік шекарадан өтуге рұқсат беру рәсімдері жеңілдетіледі.

Спорт және білім саласындағы жаңалықтар

Сонымен қатар, құжатта «гид», «экскурсовод», «туризм нұсқаушысы», «туристік ресурстар» және «туристік нысандар» сияқты негізгі ұғымдар біріздендіріледі. Бұл гидтер мен нұсқаушылардың қызметін кәсіпкерлік формасымен шектемей, білікті мамандар санын көбейтуге мүмкіндік береді.

Балалар мен жасөспірімдер спортын қаржыландыру жүйесін реформалау да көзделген. Атап айтқанда, спортты дамытуға арналған бюджеттен тыс қаражатты бөлетін бірыңғай оператордың қаржылық есептілігіне жыл сайын аудит жүргізу міндеттеледі. Сондай-ақ, мемлекеттік балалар-жасөспірімдер спорт мектептерінде жан басына шаққандағы қаржыландыру нормативі бекітіледі.

Айта кетейік, Сенат «Туристік сала мен балалар спортын қолдау мәселелері бойынша Қазақстан Республикасының кейбір заңнамалық актілеріне өзгерістер мен толықтырулар енгізу туралы» Заңды мақұлдады.