InfoHub Logo

17 жасқа дейінгі Қазақстан жасөспірімдер құрамасы Минскідегі «Даму Кубогы» халықаралық турнирінде топтық кезеңді сәтті аяқтап, қола жүлде үшін таласқа шығады. Команда топтағы соңғы ойынында Тәжікстанды 3:1 есебімен тізе бүктіріп, А тобында екінші орынды иеленді.

Бұл туралы Infohub.kz ақпарат агенттігі хабарлайды.

Турнирдегі жол

Тәжікстанмен өткен кездесуде алғашқы минутта гол жіберіп қойғанына қарамастан, қазақстандықтар рухтарын түсірмеді. Ойынның бірінші таймында ҚФА Академиясының ойыншысы Ануар Төленді есепті теңестірді (1:1). Матч тең аяқталады деп тұрғанда, ойынның соңғы бес минутында «Қайраттың» ойыншысы Ислам Рақым командасын алға шығарды. Ал ойынның аяғында оның әріптесі Роман Черноморец тағы бір гол соғып, команданың жеңісін нығайтты.

Топтағы орнымыз

Қазақстан құрамасы топтағы екі ойында да 3:1 есебімен Тәжікстанды және Минскіні жеңіп, ал Беларусь құрамасынан 0:2 есебімен ұтылып қалды. Осылайша, Бауыржан Сағандықтың шәкірттері А тобында екінші орынды иеленді.

Қола үшін тартыс

Турнирдің соңғы күнінде біздің команда В тобында екінші орын алған Өзбекстан құрамасымен қола медаль үшін кездеседі. Ал алтын жүлде үшін Беларусь пен Ресей құрамалары таласады. Бесінші орын үшін Тәжікстан мен Әзірбайжан, жетінші орын үшін Минск пен Беларусь (U16) командалары сынға түседі.

«Даму Кубогы» – жас таланттарға алаң

«Даму Кубогы» турнирі 2005 жылдан бері жыл сайын Минскіде өтіп келеді. Қазақстандық футболшылар бұл турнирге биыл жетінші рет қатысып отыр. Бұған дейін 2021 және 2023 жылдары команда екінші орынды иеленген болатын.

Еуропа чемпионатына дайындық

Бұл турнир – Қазақстанның 17 жасқа дейінгі құрамасының Еуропа чемпионатының іріктеу кезеңіне дайындығының бір бөлігі. Сәуір айының соңында жас футболшыларымыз Дания, Чехия және Австрия құрамаларымен бірге Еуропа чемпионатына жалғыз жолдаманы сарапқа салады. Өткен жылы қазақстандықтар алғаш рет іріктеудің екінші кезеңіне шыққан болатын.

Еуропаның үздік 8 жасөспірімдер (U17) құрамасы қатысатын финалдық кезең 25 мамыр мен 7 маусым аралығында Эстонияда өтеді.