InfoHub Logo

Танымал әнші Мақпал Исабекованың басынан өткен жағдай көпшілікті бей-жай қалдырмады. Өнер иесі өзінің Instagram парақшасында қызы Илаяның қолын абайсызда шығарып алғанын және одан кейінгі күйзелісін бөлісті.

Бұл туралы Infohub.kz ақпарат агенттігі хабарлайды.

Қатты қорқыныш пен өкініш

Әншінің айтуынша, оқиға олардың үшеуі бірге матраста секіріп ойнап жүргенде болған. Ол қызының қолынан байқамай қатты тартып алғанда, Илая қатты жылап, қолы ауырғанын айтқан.

«Сол сәтте жүрегім езіліп кетті. Мен де онымен бірге жылай бастадым», - деп жазды Исабекова.

Травмпунктке шұғыл

Кейін олар тез арада травмпунктке барған. Жол бойы қызы да, өзі де жылап отырғанын айтқан әнші, өзін қатты кінәлап, өкінгенін жеткізді.

«Құдай-ау, өзімді қалай ұрыстым, сөктім… Әлі күнге дейін отырамын да жылаймын. Оған қарап, өзімді сондай кінәлі сезінемін, күшімді есептемей қалдым», - деп жазды ол.

Дәрігердің диагнозы

Тексеруден кейін дәрігер қыздың буыны шығып кеткенін анықтап, орнына салып берген. Алайда, енді оның қолына ұқыпты қарау керектігін, қайтадан шығып кету қаупі бар екенін ескерткен.

«Кешір мені, қызым, өтінемін, кешір мені. Әлі де өз-өзімді жұбата алмай отырмын, жылап отырмын, ал ол болса: «мама, жылама» деп мені сүйіп жатыр. Құдай-ау, жүрегім өкініштен шынымен жыртылып бара жатқандай…», - деп толғанысын білдірді әнші.