InfoHub Logo

Қазақстанда өткен республикалық референдумнан кейін Орталық референдум комиссиясына (ОРК) екі талап-арыз келіп түскен. Комиссия мүшесі Әсел Жанабилованың айтуынша, соттар екі өтінішті де қарап, талапкерлердің талаптарын қанағаттандырудан бас тартты.

Бұл туралы Infohub.kz ақпарат агенттігі хабарлайды.

Бір талап-арыз Ақтөбе облысындағы учаскеде Брайль шрифтімен жазылған трафареттің оқылмайтынына қатысты болса, екіншісі Астанадағы учаскелік комиссияның бақылаушыны шығару туралы шешіміне қарсы берілген. Соттар екі талап-арызды да қанағаттандырудан бас тартты.

Жалпы 35 өтініш келіп түсті

Әсел Жанабилованың сөзінше, дауыс беру күні жалпы 35 өтініш келіп түскен. Олар заңнаманы, референдумның мәнін, учаскелік комиссиялардың жұмысын және шетелдегі дауыс беруді қамтыған.

Барлық өтініштер бойынша түсініктеме беріліп, кейбірі аумақтық комиссиялар мен тиісті органдарға жолданды.

Астанада – 11, Алматыда – 6, Маңғыстау облысында – 4, Шымкентте, Абай және Қызылорда облыстарында – 3-тен, Алматы, Ақмола, Шығыс Қазақстан, Жамбыл және Павлодар облыстарында бір-бірден өтініш тіркелген.

«Өтініштер референдумның мәні, дауыс беру процесі, учаскелерді ауыстыру, открепительный талондар алу, учаскелердің орналасуы және дауыс беру күніндегі бұзушылықтарға қатысты болды. Аумақтық комиссиялар 33 өтінішке заңнамаға сәйкес жауап берді», - деді Жанабилова.

ОРК барлық өтініштер белгіленген тәртіппен қаралғанын атап өтті. Келіп түскен өтініштер мен ескертулер дауыс берудің барысына және референдумның қорытындысына елеулі әсер етпеген.

Жаңа Конституция туралы

Бүгін ОРК жаңа Конституцияны қабылдау бойынша референдумның қорытындысын жариялады. Комиссия деректері бойынша, жаңа Конституцияны 7 954 667 азамат қолдап дауыс берген. Бұл дауыс бергендер санының 87,15 пайызын құрайды. Қарсы 898 099 адам дауыс берді.

Конституция мәтінінің шамамен 84 пайызы өзгеріске ұшырады. Басты жаңалықтар қатарында вице-президент лауазымының енгізілуі, бір палаталы Парламент – Құрылтайға көшу және Қазақстан халық кеңесі атты жаңа консультативтік орган құру бар.

Президенттікке кандидаттарға қойылатын талаптар да өзгерді: енді олардың мемлекеттік қызметте немесе сайланбалы лауазымдарда кемінде бес жыл жұмыс өтілі болуы керек. Президент бір мерзімге ғана сайланатыны туралы норма сақталады.

Сонымен қатар, Конституцияда азаматтардың құқықтары мен бостандықтары, жеке деректерді қорғау, тілдердің мәртебесі, дін, сондай-ақ некені ер мен әйелдің одағы ретінде бекітетін жаңа ережелер енгізілді. Халықаралық шарттар, өңірлердегі арнайы құқықтық режимдер және ұйымдардың шетелдік қаржыландыруының ашықтығы туралы ережелер де енгізілді.