InfoHub Logo

28 наурызда Санкт-Петербургте өткен жолдастық кездесуде Ресейдің 10 дүркін чемпионы «Зенит» қазақстандық «Қайрат» командасын қабылдады. Матч «Газпром Арена» стадионында өтті. Матч алдында Қазақстан мен Ресей гимндерін Мариин театрының солисті, халықаралық байқаулардың лауреаты Сергей Семишкур орындады. Алайда, қазақстандық әнұранның орындалуы желіде қызу пікірталас тудырды.

Бұл туралы Infohub.kz ақпарат агенттігі хабарлайды.

Желідегі пікірлер

Кейбір қолданушылар әнұранның орындалуындағы қазақ тілінің айтылуы мен акцентіне назар аударып, сынға алды. Олар мұны ұлттық рәміздерге деген құрметсіздік деп санады.

«Неге акцентсіз айтуға болмайды? Басқа елдердің әндерін де осылай орындай ма екен? Мен бұл жағдайға қуана алмаймын», - деп жазды бір желі қолданушысы.

Енді біреулер: «Бір жағынан жақсы, екінші жағынан ұят сияқты. Егер біз «Зенит» келгенде орыс гимнін өз акцентімізбен айтсақ, оларға қалай болар еді?» деп пікір білдірді.

Қолдау мен түсіністік

Алайда, көпшілік бұл әрекетті Қазақстанға деген құрмет белгісі ретінде қабылдады. Олар өзара сыйластық пен татулықты сақтаудың маңыздылығын атап өтті.

«Бұл ең алдымен бізге деген құрметті көрсетеді. Біз өзара сыйластықпен, бейбітшілікте өмір сүруіміз керек. Ресей біздің достық ел екенін көрсетті», - деді бір пікір білдіруші.

Басқалары: «Егер қазақ орысша акцентпен сөйлесе, біз одан «Неге орысша сөйлейсің?» деп сұрамаймыз ғой. Айтса айтсын, тіпті акцентпен, тіпті қатемен болса да, бастысы айтты емес пе? Біз өзіміз де бәрін бірден мінсіз айта бермейміз, уақыт өте келе бәрі реттеледі», - деп өз ойын жеткізді.

Осылайша, гимннің орындалуы пікірталасқа арқау болды. Әртүрлі реакцияларға қарамастан, көпшілік халықаралық матчта Қазақстан гимнінің шырқалуы құрмет көрсетудің маңызды белгісі екендігімен келісті.