InfoHub Logo

Қазақстан Сенаты жануарларға қатысты жаңа заң жобасындағы «эвтаназия» терминін қолданудан бас тартты. Бұл шешім қоғамда қызу талқылау тудырған нормаларды қайта қарау аясында қабылданды.

Бұл туралы Infohub.kz ақпарат агенттігі хабарлайды.

Терминнің алынып тасталуы

Мәжіліс мақұлдаған заң жобасында бұрын қаңғыбас жануарларға қатысты «эвтаназия» термині қолданылған болатын. Онда жануарлар приютке немесе уақытша ұстау орнына әкелінгеннен кейін бес тәулік өткен соң, сондай-ақ ауруы асқынған, себепсіз агрессия көрсеткен немесе белгіленген мерзімде иесі табылмаған жануарларға қатысты осы шара қолданылуы мүмкін еді.

Алайда, Сенат депутаттары бұл терминнің өзін заңнамадан алып тастауды ұйғарды. Олар жануарлар санын реттеуге деген көзқарасты қайта қарау қажеттігін атап өтті.

Қоғамдық резонанс пен депутат пікірі

Сенатор Арман Өтеғұлов бұл заң жобасының қоғамда кеңінен талқыланып, бұқаралық ақпарат құралдары мен жануарлар құқығын қорғау ұйымдарының назарын аударғанын айтты. Оның айтуынша, «эвтаназия» – бұл жануарлар санын реттеудің әдісі емес, тек ерекше жағдайларда ғана қолданылатын соңғы шара.

«Созылмалы аурулар мен ветеринар дәрігерінің қорытындысы бойынша жануардың өмірінің сапасы нашарлаған жағдайда ғана иесі эвтаназия жасау туралы шешім қабылдауға құқылы. Бұл ветеринариялық және этикалық нормаларды қатаң сақтаған кезде ғана мүмкін болады», – деді депутат.

Сенатор соңғы жылдары қаңғыбас жануарлар мәселесінің жүйелі сипат алғанын, бұл халықтың қауіпсіздігіне, санитарлық жағдайға және бюджет қаражатын тиімді пайдалануға әсер ететінін жеткізді.

Бұған дейінгі ұсыныстар

Бұған дейін Қазақстанда үйсіз жануарларға қатысты «таймер» енгізу, яғни приюттерде ұстау мерзімін шектеу ұсынылған болатын. Егер белгіленген мерзімде жануарларды ешкім алмаса, оларға эвтаназия жасауға рұқсат етілуі керек еді. Экология министрлігі мұндай шараларды қолданыстағы ОСВВ (ұстау – стерилизациялау – вакцинациялау – шығару) жүйесінің тиімсіздігімен түсіндірген болатын.

Сондай-ақ, жаңа заң жобасында үй жануарларын міндетті түрде чиптеу, қатыгездік үшін жауапкершілікті күшейту және оларды көбейтуді реттеу қарастырылған. Алайда, қоғамның бір бөлігі бұған қарсы шығып, мұндай шаралар жануарларды жаппай қыруды заңдастыруға әкеп соғатынын айтуда. Олардың орнына приюттерді дамытуды, иелерін бақылауды және жүйелі алдын алу шараларын ұсынып отыр.

«Жануарларға қатысты жауапты қарым-қатынас туралы» заң 2021 жылы қабылданғанымен, оның көптеген нормалары әлі толыққанды жұмыс істемейтіні айтылады.