InfoHub Logo

Шалқар қаласында 17 жастағы жасөспірімнің қаза болуына қатысты іс бойынша тағы екі күдікті ұсталды. Бұл оқиға қоғамда үлкен резонанс тудырды.

Бұл туралы Infohub.kz ақпарат агенттігі хабарлайды.

17 жастағы Әлихан Жәнібек 20 наурызға қараған түні кәмелетке толмағандар арасындағы топтық жанжал кезінде қаза тапты. Туыстарының айтуынша, бұл «аудан-аудан» арасындағы төбелес болған. Жасөспірім кеудесінен пышақ жарақатын алып, оқиға орнында көз жұмды.

Іс қозғалып, күдіктілер анықталды

Полиция департаменті аталған факті бойынша қылмыстық іс қозғағанын хабарлады. Жанжалға қатысқан барлық тұлғалар анықталып, полиция бөліміне жеткізілді. Олардың әрекеттеріне заң аясында құқықтық баға берілетін болады.

Кейінірек кісі өлтіру күдігімен Шалқар қаласының 18 жастағы тұрғыны ұсталды. Алайда, 21 наурызда марқұмның әкесі Жәнібек Әлиманов облыс әкіміне, прокурорға және полиция департаментінің басшысына жүгініп, жанжалға екі тараптан 14–15 жасөспірім қатысқанын, бірақ тек бір адам ғана ұсталғанын айтты. Ол қалған қатысушылардың әрекеттеріне де құқықтық баға беруді және істі жан-жақты тергеуді талап етті.

Тергеу жалғасуда

26 наурызда полиция департаменті істің ҚР Қылмыстық кодексінің «кісі өлтіру» және «топпен жасалған бұзақылық» баптары бойынша тергеліп жатқанын мәлімдеді. Қазіргі уақытта үш күдікті уақытша ұстау изоляторына қамалды. Сонымен қатар, оқиғаның куәгерлері мен басқа да қатысушылар анықталған.

Қылмысты тергеу үшін тәжірибелі тергеушілер мен жедел қызметкерлерден арнайы жедел-тергеу тобы құрылды. Іс облыстық полиция департаментінің қарауына беріліп, тергеу барысы басшылықтың ерекше бақылауына алынды.

Шалқардағы жасөспірімнің өлімі қоғамда алаңдаушылық туғызды. Құқық қорғау органдары барлық кінәлілер заң алдында жауап беретінін мәлімдеді.