InfoHub Logo

Белгілі қазақстандық ғалым, математик Санжар Аспандияровтың өмірден озғаны туралы қайғылы хабар келді. Оның есімі Францияның әлемге танымал Сорбонна университетінде докторлық диссертация қорғап, сабақ берген алғаш реткі қазақ ретінде тарихта қалды.

Бұл туралы Infohub.kz ақпарат агенттігі хабарлайды.

Санжар Аспандияровтың туыстары мен әріптестерінің айтуынша, оның ғылыми еңбектері мен дарыны Отанында толыққанды бағаланбағанымен, шетелде, әсіресе Еуропада, сұранысқа ие болған.

Ғылымдағы елеулі тұлға

Санжар Аспандияров теориялық ықтималдылық саласында көптеген еңбектердің авторы. Ол бес тілде еркін сөйлеп, Жапониядан АҚШ-қа дейінгі ғылыми гранттардың иегері атанған. Соңғы жылдары Лондонда тұрғанымен, өсиеті бойынша Алматыда жерленді. Оның еуропалық математиктермен бірлескен зерттеуі жарық көргелі жатыр, онда жұмыстың үштен екісі Санжар Аспандияровтың үлесіне тиесілі.

Ғылыми әулеттің өкілі

Санжар Аспандияров 1968 жылы 10 ақпанда ғылымға терең тамыр тартқан отбасында дүниеге келген. Оның атасы, Біләл Аспандияров, тарихшы, тілші және ағартушы болса, әкесі, Серік Біләлұлы Аспандияров, физик-ғалым, жоғары қысымды алмас камерасын жасап, ғылымға елеулі үлес қосқан тұлға.

Алматыдағы №56 орта мектепті 14 жасында бітірген Санжар, 15 жасында жас математик ретінде деректі фильмге түсірілген. Мәскеу мемлекеттік университетінің механика-математика факультетін үздік бітіргеннен кейін, Франциядағы École normale supérieure докторантурасында білімін жалғастырды. Ол Сорбоннада докторлық диссертация қорғаған алғашқы қазақ атанды.

Сонымен қатар, Аспандияров Credit Suisse және Citigroup сияқты әлемге танымал қаржы институттарында қызмет атқарды. Оған күрделі, бейстандартты мәселелерді шешу сеніп тапсырылды, бұл оның терең кәсіби білімін ғана емес, жүйелі, стратегиялық ойлау қабілетін де талап етті.