InfoHub Logo

Қазақстанның халық әртісі, белгілі әнші Мақпал Жүнісова әуежайда домбырасына байланысты күтпеген жағдайға тап болғанын айтты. Бұл туралы ол өзінің сапары барысында болған оқиғаны баяндап берді.

Бұл туралы Infohub.kz ақпарат агенттігі хабарлайды.

Әуежайдағы түсініспеушілік

Әншінің айтуынша, Қостанайға ұшар алдында әуежай қызметкерлері домбыраны ұшаққа өткізу үшін қосымша ақы төлеу керектігін мәлімдеген. Бұл талап әнші мен әуежай қызметкерлері арасында аздаған түсініспеушілік тудырған.

«Әуежайға келдік. Тағы да айқай-шу басталды. Тағы бір қыз келіп, «домбыраны өткізуге болмайды» деп қақылдап кетті. Бұған тағы да ақша төлейсіз дейді. Депутаттар шешкен сияқты еді, анығын кім біледі?» - деп күйінішін білдірді Мақпал Жүнісова.

Күтпеген шешім

Әнші алғашында бұл талапқа реніш білдіргенімен, кейін әуежай қызметкерлерімен ортақ келісімге келіп, домбыраны ұшаққа өткізу үшін 5 мың теңге төлегенін айтты. Ол бұл соманы бұрынғы төлемдермен салыстырғанда әлдеқайда арзан екенін атап өтті.

«Жүйкеміз орнына түсті. Домбыраға бес мың теңге ақша алды. Осы жолы арзан алды. Ана жолы 65 мың теңгеге шапка мен домбыраға билет алып едім. Бұл жолы өте арзан екен», - деп күлді халық әртісі.

Концерт және тыңдармандар

Әнші сапарының басты мақсаты – Қостанайдағы көрермендермен кездесу екенін айтып, қала тұрғындарына сәлем жолдады. Сондай-ақ концертте жақсы ән айтып, тыңдармандарына көтеріңкі көңіл күй сыйлауға уәде берді.

Мақпал Жүнісова – қазақ эстрадасының танымал тұлғаларының бірі. Ол көптеген халықаралық байқаулардың жеңімпазы, Қазақстанның еңбек сіңірген әртісі және Халық әртісі атақтарына ие. Қазіргі таңда ол қазақ эстрадасының «примадоннасы» әрі «Орта Азия бұлбұлы» ретінде танымал.