InfoHub Logo

АҚШ президенті Дональд Трамптың Флоридадағы Мар-а-Лаго резиденциясына қарулы ер адам кіріп, Құпия қызмет агенттері оны атып өлтірді. Бұл туралы ведомствоның баспасөз қызметі хабарлады.

Бұл туралы Infohub.kz ақпарат агенттігі хабарлайды.

Оқиғаның мән-жайы

Агенттіктің хабарлауынша, атылған ер адам шамамен 20 жаста болған. Оның қолында жанар-жағармай құйылған канистра болған.

«Қарулы ер адамды АҚШ Құпия қызметінің агенттері Мар-а-Лагоның күзетілетін аумағына заңсыз кіргеннен кейін атып өлтірді. Қосымша ақпарат беретін баспасөз мәслихаты таңғы сағат 9:00-де ФБР және Палм-Бич округінің өкілдерінің қатысуымен өтеді», - делінген Құпия қызметтің хабарламасында.

Ведомство ер адамның аты-жөні туыстарына хабарланбайынша жарияланбайтынын нақтылады.

Қарсылық көрсету әрекеті

Трамптың Мар-а-Лаго резиденциясының аумағына мылтықпен кірген ер адам қарсылық көрсетуге тырысқанын кейінірек шериф Рик Брэдшоу мәлімдеді.

Оның айтуынша, қарулы ер адамды сержант пен екі күзет агенті көрген. Ер адамның болжамды орналасқан жеріне келгенде, оларға канистра мен мылтықты тастауды бұйырған.

Ер адам канистраны жерге қойғанымен, мылтықты атуға дайындаған кезде, сержант пен Құпия қызмет агенттері оған оқ жаудырып, «қауіпті жойды», деді ол.

«Қазіргі уақытта бізге белгілісі осы. Тергеу жалғасуда. Бұл іс бойынша ФБР бас тергеу органы болып табылады және біз оларға қажетті көмекті көрсетеміз», - деп қосты ол.

Мар-а-Лаго – Флоридадағы жеке резиденция, ол АҚШ-тың 45-ші және 47-ші президенті Дональд Трампқа тиесілі. Ресми түрде 2019 жылдың қарашасынан бері Трамп отбасының тұрақты мекені болып саналады.

Еске сала кетейік, 2024 жылдың шілдесінде сайлауалды науқан кезінде Дональд Трампқа Пенсильвания штатындағы митингіде қастандық жасалған болатын.