قازاقستاندىقتاردىڭ ۇيالى بايلانىس مۇنارالارى مەن ەلەكتروماگنيتتىك ورىستەرگە قاتىستى الاڭداۋشىلىعى وتاندىق مامانداردىڭ ارنايى زەرتتەۋ جۇرگىزۋىنە سەبەپ بولدى. قازاقستاننىڭ ءبىرقاتار عىلىمي جانە مەديسينالىق ۇيىمدارىنىڭ ساراپشىلارى 4G جانە 5G تەحنولوگيالارىنا قاتىستى قورقىنىشتاردىڭ قانشالىقتى نەگىزدى ەكەنىن تەكسەرۋ ءۇشىن جۇزدەگەن جاريالانىمدار مەن شولۋلاردى زەردەلەدى، دەپ حابارلايدى infohub.kz سايتى.
سانيتارلىق-ەپيدەميولوگيالىق باقىلاۋ كوميتەتىنىڭ مالىمەتىنشە، ساراپشىلار مەتا-تالداۋلار مەن جۇيەلى شولۋلاردى قوسا العاندا، 250-دەن استام عىلىمي جاريالانىمدى زەرتتەگەن.
ناتيجەسىندە ساراپشىلار 5G تەحنولوگيالارىنىڭ ادام دەنساۋلىعىنا تەرىس اسەرى تۋرالى نانىمدى دالەلدەر تاپپادى. الايدا بۇل حالىقارالىق ەلەكتروماگنيتتىك قاۋىپسىزدىك نورمالارى ساقتالعان جاعدايدا عانا.
ءوز كەزەگىندە سانيتارلىق-ەپيدەميولوگيالىق باقىلاۋ كوميتەتى قازاقستاندا ەلەكتروماگنيتتىك ورىستەردىڭ دەڭگەيى سانيتارلىق-گيگيەنالىق نورماتيۆتەرمەن رەتتەلەتىنىن اتاپ ءوتتى. بۇل رەتتە ولار جۇمىسشىلارعا كاسىبي اسەر ەتۋ نورماتيۆتەرىنەن تومەن بەلگىلەنەدى جانە ايتارلىقتاي گيگيەنالىق قاۋىپسىزدىك قورىن قاراستىرادى.
«بەلگىلەنگەن تالاپتار ساقتالعان كەزدە ۇيالى بايلانىس مۇنارالارى مەن 4G جانە 5G جابدىقتارىنىڭ بولۋى ولاردى حالىقتىڭ دەنساۋلىعىنا ءقاۋىپتى دەپ ساناۋعا نەگىز بولمايدى»، – دەپ اتاپ ءوتتى كوميتەتتە.
كوميتەت ازاماتتارعا الەۋمەتتىك جەلىلەردەگى حابارلامالارعا ەمەس، عىلىمي جانە رەسمي دەرەكتەرگە سۇيەنۋدى ۇسىندى.
بۇعان دەيىن «كۋرسيۆ» 2023–2025 جىلدارى رەسپۋبليكادا 2،6 مىڭنان استام 5G بازالىق ستانسياسى سالىنعانىن جازعان بولاتىن. ناتيجەسىندە 5G قۇرىلعىلارىنىڭ ۇلەسى 50%-دان استى، ال جاڭا بۋىن جەلىسىنە ەلىمىزدەگى بارلىق داتا-ترافيكتىڭ 30%-ى تيەسىلى.
ەسكە سالايىق، 5G – ۇيالى بايلانىستىڭ بەسىنشى بۋىنى. ول 4G بايلانىسىن الماستىرادى. جاڭا جەلى سەكۋندىنا 1–2 گبيت/س جانە ودان جوعارى جىلدامدىقتاعى ينتەرنەتتى، سونداي-اق سيگنالدىڭ تومەن كىدىرىسىن قامتاماسىز ەتەدى.