قازاقستان رەسپۋبليكاسى ادىلەت مينيسترلىگى اتا-انالاردىڭ بالاعا تەگى، اتى جانە اكەسىنىڭ اتىن بەرۋ ماسەلەسىنە قاتىستى تۇسىنىكتەمە بەردى. بۇعان قازاقستاندىقتاردىڭ الەۋمەتتىك جەلىلەردە تۋۋ تۋرالى كۋالىكتى ونلاين رەسىمدەۋ كەزىندە تۋىنداعان پروبلەمالارعا شاعىمدانۋى سەبەپ بولدى، دەپ حابارلايدى infohub.kz سايتى.
ۆەدومستۆونىڭ ايتۋىنشا، ق ر ازاماتتىق كودەكسىنىڭ 15-بابىنا سايكەس، ازامات ءوز قۇقىقتارى مەن مىندەتتەرىن ءوز اتىمەن جۇزەگە اسىرادى، وعان تەگى مەن اتى، سونداي-اق قالاۋى بويىنشا اكەسىنىڭ اتى كىرەدى. سونىمەن قاتار، «نەكە (ەرلى-زايىپتىلىق) جانە وتباسى تۋرالى» كودەكستىڭ 194-بابىندا تۋۋدى مەملەكەتتىك تىركەۋ كەزىندە بالانىڭ تەگى اتا-اناسىنىڭ تەگىمەن انىقتالاتىنى بەلگىلەنگەن. اتا-اناسىنىڭ تەگى ءارتۇرلى بولعان جاعدايدا، بالاعا اتا-اناسىنىڭ كەلىسىمى بويىنشا اكەسىنىڭ نەمەسە اناسىنىڭ تەگى بەرىلەدى.
ازاماتتاردىڭ قالاۋى بويىنشا قازاق ۇلتىنىڭ ادامدارىنىڭ تەگى مەن اكەسىنىڭ اتىن جازۋدا قازاق تىلىنە ءتان ەمەس -وۆ، -ەۆ، -وۆا، -ەۆا، -ين، -ن، -ينى، -نا، -وۆنا، -ەۆنا، -وۆيچ، -ەۆيچ اففيكستەرى قولدانىستان شىعارىلاتىنى اتاپ ءوتىلدى. ولاردىڭ ورنىنا اكەسىنىڭ اتىندا - ۇلى، - قىزى جالعاۋلارى بىرگە جازىلادى. سونداي-اق قازاق ۇلتى ادامدارىنىڭ اتىن اكەسىنىڭ اتى تەگىنىڭ ورنىنا جۇرەتىندەي ەتىپ جازۋعا رۇقسات ەتىلەدى، بۇل رەتتە تەگى ءبىرىنشى ورىندا تۇرۋى مىندەتتى، سودان كەيىن اتى جازىلادى، ال اكەسىنىڭ اتى قالاۋى بويىنشا جازىلادى. اكەسىنىڭ اتى تەگىنىڭ ورنىنا - ۇلى، - قىزى جالعاۋلارىمەن جازىلعان جاعدايدا، اكەسىنىڭ اتى جازىلمايدى.
ءاتى-جوندى جازۋ مىسالدارى كەلتىرىلگەن: احمەتوۆ سەرىك ايبەك ۇلى ايبەك ۇلى سەرىك (اكەسىنىڭ اتى تەگىنىڭ ورنىنا)، احمەت سەرىك ايبەك ۇلى، نەمەسە ايبەك سەرىك ايبەك ۇلى، نەمەسە ايبەك سەرىك (اكەسىنىڭ اتى قالاۋى بويىنشا كورسەتىلەدى) دەپ جازىلۋى مۇمكىن.
«وسىنى ەسكەرە وتىرىپ، زاڭنامالىق دەڭگەيدە اتا-انالارعا بالانىڭ ءاتى-جونىن ارالاس جازۋعا تىيىم سالىنباعان، الايدا ءاتى-جوندى جازعاندا قازاق ءتىلىنىڭ گرامماتيكاسىن ەسكەرگەن ءجون»، — دەپ ءتۇسىندىردى ۆەدومستۆودا.
ادىلەت مينيسترلىگىندە سونداي-اق تاجىريبەدە ازاماتتاردىڭ مەملەكەتتىك قىزمەتتەردى الۋ ءۇشىن ەكىنشى دەڭگەيدەگى بانكتەردىڭ ءموبيلدى قوسىمشالارىن بەلسەندى پايدالاناتىنىن اتاپ ءوتتى. دەگەنمەن، ازاماتتىق حال اكتىلەرىن مەملەكەتتىك تىركەۋ سالاسىنداعى تىركەۋشى ورگان «ازاماتتارعا ارنالعان ۇكىمەت» مەملەكەتتىك كورپوراسياسى» اق بولىپ تابىلادى. قازىرگى ۋاقىتتا ازاماتتار بالانىڭ تۋۋىن مەملەكەتتىك تىركەۋ تۋرالى ءوتىنىشتى «سيفرلىق ۇكىمەت» ۆەب-پورتالى ارقىلى، سونداي-اق حقكو-عا جۇگىنۋ نەمەسە تىكەلەي ازاماتتىق حال اكتىلەرىن مەملەكەتتىك تىركەۋ سالاسىنداعى تىركەۋشى ورگانعا جۇگىنۋ ارقىلى بەرە الادى.