قازاقستاندىق بوكسشى ايدا ساتىبالدينوۆا وليمپيادا چەمپيونى دانيار ەلەۋسينوۆتىڭ سوڭعى مالىمدەمەلەرىنە قاتىستى پىكىر ءبىلدىرىپ، ونىڭ مەنەدجەرى زيا اليەۆكە جۇگىندى، دەپ حابارلايدى infohub.kz سايتى.
سپورتشى Instagram-داعى ستوريزىندە بوكسشىنىڭ وكىلىن احۋالعا نازار اۋدارۋعا شاقىردى.
«ونىڭ نە كۇيدە جۇرگەنىن كورىپ وتىرسىزدار. ونىڭ پروموۋتەرى رەتىندە دانيارعا كومەكتەسە المايسىز با؟» — دەپ جازدى ول.
ساتىبالدينوۆا ەلەۋسينوۆكە مامانداردىڭ كومەگى قاجەت بولۋى مۇمكىن دەپ تە بولجادى.
«ەگەر وعان مامانداردىڭ كومەگى، پسيحولوگيالىق قولداۋ نەمەسە وڭالتۋ قاجەت بولسا، مەنىڭشە، ءسىز وسىعان نازار اۋدارۋىڭىز كەرەك!» — دەلىنگەن ساتىبالدينوۆانىڭ جۇگىنۋىندە.
بۇعان دەيىن وليمپيادا چەمپيونى دانيار ەلەۋسينوۆ الكوگولگە تاۋەلدىلىگى تۋرالى العاش رەت اشىق مالىمدەپ، جانكۇيەرلەرىنە جۇگىنگەن بولاتىن.
ەسكە سالايىق، شىلدە ايىنىڭ باسىندا دانيار ەلەۋسينوۆ قاماۋعا الىنىپ، جۇرگىزۋشى كۋالىگىنەن ايىرىلعان. سونداي-اق استانالىق پوليسيا ونىڭ جكو-دان كەيىنگى ۇستالۋ ءساتىن كورسەتتى.
سونىمەن قاتار شىلدە ايىنىڭ سوڭىندا قاراعاندىدا ەكى جەرگىلىكتى تۇرعىن ايەلدى ۇرىپ-سوعۋ ءىسى بويىنشا ۇكىم جاريالانىپ، كىنالى دەپ دانيار ەلەۋسينوۆتىڭ ايەلى تانىلدى.