الماتى قالالىق سوتىنىڭ قىلمىستىق ىستەر جونىندەگى اپەللياسيالىق القاسى Air Astana-نىڭ ەنشىلەس كومپانياسى FlyArystan-داعى 1 ملرد تەڭگەدەن استام قاراجاتتى يەمدەنۋ جانە قىلمىستىق كىرىستەردى زاڭداستىرۋ ءىسى بويىنشا ۇكىمدى وزگەرىسسىز قالدىردى، دەپ حابارلايدى infohub.kz.
باس كولىك پروكۋراتۋراسىنىڭ مالىمەتىنشە، اپەللياسيالىق ساتى ۇكىمدى وزگەرىسسىز قالدىرىپ، قورعاۋ شاعىمدارىن قاناعاتتاندىرمادى.
ەسكە سالا كەتەيىك، بۇل ءىس FlyArystan كومپانياسىنداعى قاراجات يەمدەنۋگە بايلانىستى. 2024 جىلدىڭ باسىندا اۆيابيلەتتەرمەن الاياقتىق انىقتالعان سوڭ ىشكى تەرگەۋ باستالدى. سول جىلدىڭ قازانىندا تاۋەلسىز اۋديت قورىتىندىلاردى راستاپ، ماتەريالدار قۇقىق قورعاۋ ورگاندارىنا بەرىلدى.
تەرگەۋ نۇسقاسى بويىنشا، قاراجات يەمدەنۋگە بۇرىنعى توپ-مەنەدجەرلەر داۋر ەركەن ۇلى، ەركىن يسانوۆ جانە رەنات ابۋلحانوۆ قاتىستى. ولار ساتۋ، كىرىس ەسەبى جانە باعدار جەلىسىن باسقارۋ بولىمدەرىندە باسشىلىق قىزمەتتەر اتقارعان. الاياقتىق سحەماسى ارقىلى اۆيابيلەتتەردى ساتۋ كەزىندە كومپانياعا 1 ملرد تەڭگەدەن استام زالال كەلتىرگەن.
2026 جىلعى مامىردا الماتى قالاسىنىڭ المالى اۋداندىق سوتى ۇشەۋىن دە اسا ءىرى مولشەردە قاراجات يەمدەنۋ جانە قىلمىستىق كىرىستەردى زاڭداستىرۋ بويىنشا كىنالى دەپ تانىدى. داۋر ەركەن ۇلى توعىز جىلعا، ال ەركىن يسانوۆ پەن رەنات ابۋلحانوۆ سەگىز جىل التى ايعا باس بوستاندىعىنان ايىرىلدى. ۇشەۋىنىڭ دە مۇلكى تاركىلەنىپ، بەس جىل بويى كوممەرسيالىق ۇيىمداردا باسشىلىق لاۋازىمداردى اتقارۋعا تىيىم سالىندى. جازاسىن ورتاشا قاۋىپسىزدىك كولونياسىندا وتەيتىن بولادى.