چەحيانىڭ برنو قالاسىندا ءوتىپ جاتقان كوركەم گيمناستيكادان گران-پري كەزەڭىندە قازاقستاندىق گيمناست اقمارال ەرەكەشەۆا جۇلدەگەرلەر قاتارىنان كورىندى، دەپ حابارلايدى infohub.kz سايتى.
سەنبى كۇنى سپورتشىلار جەكە كوپسايىستاعى مەدالدار جيىنتىعىن ساراپقا سالدى. ءتورت باعدارلاما بويىنشا جيىنتىق ۇپاي سانىندا ەرەكەشەۆا 116،500 ۇپاي جيناپ، ەكىنشى ورىنعا تۇراقتاپ، كۇمىس مەدالعا قول جەتكىزدى.
بارلىق پاندەردە قازاقستان وكىلى ەكىنشى ناتيجەنى كورسەتتى. ونى تەك ۋكراينالىق تايسيا ونوفريچۋك قانا باسىپ وزدى، ول 117،900 ۇپاي جينادى. قولا جۇلدەنى پولياك ليليانا لەۆينسكايا 108،250 ۇپايمەن يەلەندى.
برنوداعى گران-پري كەزەڭى 13 قىركۇيەك، جەكسەنبى كۇنى اياقتالادى. بۇل كۇنى جەكەلەگەن تۇرلەردەن فينالدار وتەدى، وعان ىرىكتەۋ كەزەڭىندەگى ەڭ ۇزدىك سەگىز ناتيجەنىڭ يەلەرى جولداما الدى. ەرەكەشەۆا ءتورت ءپاننىڭ بارلىعىندا — شەڭبەر، دوپ، شىعىرشىق جانە لەنتامەن — مەدال ءۇشىن كۇرەسەتىن بولادى.
بۇعان دەيىن سپورتشىنىڭ ازيا ويىندارىنا قازاقستان قۇراماسىنىڭ ءوتىنىم تىزىمىنە ەنگەنى بەلگىلى بولدى. كوركەم گيمناستيكادان جەكە باعدارلامادا ەل نامىسىن ايبوتا ەرتاي قىزى دا قورعايدى.