اقمولا وبلىسى دەرجاۆينسك قالاسىنىڭ تۇرعىنى كوپ كەزەڭدى الاياقتىق سحەماسىنىڭ قۇربانى بولدى: وعان 25 ميلليون تەڭگەگە كرەديت راسىمدەلگەنىن ايتىپ سەندىرىپ، سوڭىندا ول الاياقتارعا 1،9 ميلليون تەڭگەدەن استام اقشا اۋدارىپ قويدى، دەپ حابارلايدى infohub.kz سايتى.
وبلىستىق پوليسيا دەپارتامەنتىنىڭ ءباسپاسوز قىزمەتى ءمالىم ەتكەندەي، الداۋ بەلگىسىز بىرەۋدىڭ قوڭىراۋىنان باستالعان. ول ەر ادامعا سالەمدەمە كەلگەنىن ايتقان. اڭگىمەلەسۋشىنىڭ نۇسقاۋىن ورىنداپ، اقمولالىق وزىنە كەلگەن SMS-كودتى ايتىپ بەرگەن.
سول-اق ارادا ونىمەن بانك قىزمەتكەرىمىن دەگەن الاياق حابارلاسقان. ول ەر ادامنىڭ اتىنا 25 ميلليون تەڭگەگە كرەديت راسىمدەلگەنىن جەتكىزگەن. ونى «جويۋ» ءۇشىن جابىرلەنۋشىگە جاڭا اقشالاي كرەديت راسىمدەۋ ۇسىنىلعان.
الاياقتار ەر ادامدى ادەيى سترەسس جاعدايىندا ۇستاپ، بولىپ جاتقان جاعدايدى سابىرمەن باعالاۋىنا مۇمكىندىك بەرمەگەن. ونىڭ ۇستىنە قۇپيالىلىقتى ساقتاۋ سىلتاۋىمەن ونى اقپاراتتى جاريالاماۋ تۋرالى قولحات جازۋعا كوندىرگەن.
الاياقتاردىڭ نۇسقاۋىن جالعاستىرا بەرگەن ەر ادام ەكى كرەديت راسىمدەپ، ءۇشىنشى تۇلعالاردىڭ شوتتارىنا 1،9 ميلليون تەڭگەدەن استام اقشا اۋدارعان.
وسى دەرەك بويىنشا پوليسيا تەرگەۋ جۇرگىزىپ، الاياقتىققا قاتىسى بار ادامداردى انىقتاپ جاتىر.