اقمولا وبلىسىندا الاياقتاردىڭ قۇربانى بولعان قارت ايەل باسپاناسىنان جانە ءىرى اقشا سوماسىنان ايىرىلدى. زەينەتكەر پاتەرىن ساتىپ، تۇسكەن اقشانى بوتەن ادامعا تابىستاعان، دەپ حابارلايدى infohub.kz.
اقمولا وبلىسى پوليسيا دەپارتامەنتىنىڭ ءباسپاسوز قىزمەتىنىڭ مالىمەتىنشە، وقيعا بۋراباي اۋدانىندا بولعان. وندا ءىرى ينتەرنەت-الاياقتىق فاكتىسى تەرگەلۋدە. قىلمىستىق سحەمانىڭ قۇربانى 1954 جىلى تۋعان جەرگىلىكتى تۇرعىن بولدى. الاياقتارعا سەنىپ، ول پاتەرىن ساتىپ، مامىلەدەن تۇسكەن 17 ميلليون تەڭگەنى بەلگىسىز ەر ادامعا بەرگەن.
قۇقىق قورعاۋ ورگاندارىنىڭ دەرەگىنشە، الاياقتار زەينەتكەرمەن ءساۋىر ايىندا بايلانىسقا شىققان. الدىمەن ولار وزدەرىن ەنەرگيامەن جابدىقتاۋ ۇيىمىنىڭ قىزمەتكەرلەرى رەتىندە تانىستىرعان. قاجەتتى قىزمەتتى راسىمدەۋ سىلتاۋىمەن ولار ايەلدى SMS-حابارلاماداعى كودتى ايتۋعا كوندىرگەن.
جابىرلەنۋشىنىڭ جەكە دەرەكتەرىنە قول جەتكىزگەن الاياقتار پسيحولوگيالىق قىسىمدى جالعاستىرعان. كەيىننەن زەينەتكەرمەن سويلەسۋگە جالعان ۇلتتىق بانك جانە قۇقىق قورعاۋ ورگاندارىنىڭ قىزمەتكەرلەرى قوسىلا باستاعان. الاياقتاردىڭ نۇسقاۋلارىن ورىنداپ، زەينەتكەر وزىنە تيەسىلى پاتەرىن ساتقان. مامىلەدەن اقشا العان سوڭ، ايەل 17 ميلليوندى ءۇي اۋلاسىنا كەلگەن بەلگىسىز ادامعا تابىستاعان.
بۋراباي اۋدانىنىڭ پوليسيا ءبولىمى الاياقتىق فاكتىسى بويىنشا قىلمىستىق ءىس قوزعادى. قازىرگى ۋاقىتتا قىلمىستىڭ بارلىق ءمان-جايىن، سونداي-اق الاياقتىق ارەكەتتەردى ۇيىمداستىرۋعا جانە جاساۋعا قاتىسى بار ادامداردى انىقتاۋعا باعىتتالعان قاجەتتى جەدەل-تەرگەۋ ءىس-شارالارى جۇرگىزىلۋدە.
پوليسيا الاياقتاردىڭ بانك، مەملەكەتتىك ورگان، قۇقىق قورعاۋ جانە كوممۋنالدىق ۇيىمداردىڭ قىزمەتكەرلەرى بولىپ ءجيى تانىساتىنىن ەسكە سالادى. ءتۇرلى سىلتاۋلارمەن ولار جەكە دەرەكتەردى، SMS-كودتاردى الۋعا، ازاماتتاردى اقشانى «ءقاۋىپسىز شوتتارعا» اۋدارۋعا نەمەسە كۋرەرگە قولما-قول اقشا بەرۋگە كوندىرۋگە تىرىسادى. بانك، قۇقىق قورعاۋ ورگاندارى جانە مەملەكەتتىك ۇيىمداردىڭ ناعىز قىزمەتكەرلەرى SMS-كودتاردى ايتۋدى، بەلگىسىز قوسىمشالاردى ورناتۋدى، اقشانى بوتەن شوتتارعا اۋدارۋدى نەمەسە بوگدە ادامدارعا قولما-قول اقشا بەرۋدى تالاپ ەتپەيتىنىن ەستە ساقتاۋ ماڭىزدى.