اقمولا وبلىسىندا پوليسيا قىزمەتكەرلەرى سيرەك كەزدەسەتىن وقيعاعا تاپ بولدى: تراسسادا ءتۇسى، ماركاسى جانە مەملەكەتتىك تىركەۋ نومىرلەرى بىردەي ەكى جۇك كولىگى توقتاتىلدى. بۇل تۋرالى infohub.kz سايتى حابارلايدى.
وبلىستىق پوليسيا دەپارتامەنتىنىڭ ءباسپاسوز قىزمەتى مالىمدەگەندەي، وقيعا 15 قىركۇيەكتە استانا — قاراعاندى — الماتى اۆتوجولىنىڭ 29-شاقىرىمىندا بولعان. پاترۋلدەۋ كەزىندە پوليسەيلەر ءبىر ءتۇستى، ءبىر مودەلدى ەكى Shacman جۇك كولىگىن بايقاعان. الايدا ەڭ تاڭعالارلىعى — ەكى كولىككە دە بىردەي مەملەكەتتىك تىركەۋ نومىرلەرى ورناتىلعان.
اقمولا وبلىسى پد پاترۋلدىك پوليسيا روتاسىنىڭ 1-ۆزۆود كومانديرى جانگەلدى الىبەكوۆ مۇنداي وقيعامەن العاش رەت كەزدەسكەنىن ايتتى.
ءبىرىنشى كولىكتى تەكسەرۋ كەزىندە ەشقانداي زاڭبۇزۋشىلىق انىقتالمادى، ال ەكىنشىسىندە ۇلكەن ماسەلەلەر تۋىندادى. مەملەكەتتىك تىركەۋ ءنومىرى كولىكتىڭ VIN-كودىنا سايكەس كەلمەگەن. سونىمەن قاتار، كولىك مۇلدە تىركەلمەگەن.
جۇرگىزۋشى استانا تۇرعىنى بولىپ شىقتى. ول كولىك وزىنە تيەسىلى ەمەس، تەك جۇرگىزۋشى بولىپ جۇمىس ىستەيتىنىن ءتۇسىندىردى. تەكسەرۋ بارىسىندا تىركەلمەگەن كولىككە جالعان مەملەكەتتىك تىركەۋ ءنومىرى ورناتىلىپ، ودان كەيىن ونىمەن جۇرە بەرگەنى انىقتالدى.
وسى فاكتى بويىنشا سوت ءوتتى. جۇرگىزۋشىگە ءۇش تاۋلىك اكىمشىلىك قاماۋ جازاسى تاعايىندالىپ، ءبىر جىلعا كولىك باسقارۋ قۇقىعىنان ايىرىلدى. كولىك يەسىنە قاتىستى جالعان مەملەكەتتىك تىركەۋ ءنومىرىن ورناتقانى ءۇشىن اكىمشىلىك ماتەريال دا جاسالدى.