قوسشى قالاسىنىڭ تۇرعىنى جۇڭگو ۋنيۆەرسيتەتىنە تۇسۋگە كومەكتەسەمىن دەپ ۋادە بەرگەن الاياققا سەنىپ، ءىرى اقشا سوماسىنان ايىرىلدى. پوليسياعا وسىعان ۇقساس سحەمادان زارداپ شەككەن تاعى ەكى ادام جۇگىنگەنىن infohub.kz سايتى حابارلايدى.
قوسشى قالاسىنىڭ پوليسيا بولىمىنە جەرگىلىكتى تۇرعىن الاياقتىق تۋرالى ارىزبەن جۇگىندى. الدىن الا مالىمەتتەرگە سايكەس، تانىس ەمەس ەر ادام جۇڭگو ۋنيۆەرسيتەتىنە تۇسۋگە جاردەمدەسەمىن دەگەن سىلتاۋمەن ونىڭ 1 ميلليون 732 مىڭ تەڭگەسىن يەمدەنىپ كەتكەن.
تەرگەۋ بارىسىندا انىقتالعانداي، شىعىس قازاقستان وبلىسىنىڭ 31 جاستاعى تۇرعىنى مەكتەپ اشقاننان كەيىن جەرگىلىكتى تۇرعىندارعا جۇڭگو ۋنيۆەرسيتەتتەرىنە ءتۇسۋ مۇمكىندىگىن ۇسىنا باستاعان. باعدارلاماعا قاتىسۋ ءۇشىن اقشالاي جارنا تولەۋ قاجەت بولعان، ۇيىمداستىرۋشىنىڭ ايتۋىنشا، ءبىر جىلدان كەيىن قاتىسۋشىلار قىتايدىڭ ءبىر جوعارى وقۋ ورنىنا تۇسە الادى.
كەيىن پوليسياعا تاعى ەكى ادام جۇگىنىپ، ءدال وسىنداي جاعدايدى بايانداعان. الدىن الا جالپى شىعىن شامامەن 4 ميلليون تەڭگەنى قۇراعان.
قازىرگى ۋاقىتتا پوليسيا قىزمەتكەرلەرى وقيعانىڭ بارلىق ءمان-جايىن جانە باسقا دا زارداپ شەككەندەردىڭ بولۋىن انىقتاپ جاتىر. تەرگەۋ ناتيجەلەرى بويىنشا كۇدىكتىنىڭ ارەكەتتەرىنە ءتيىستى قۇقىقتىق باعا بەرىلىپ، پروسەسسۋالدىق شەشىم قابىلدانادى.
پوليسيا قازاقستاندىقتاردى اقپاراتتى الدىن الا تەكسەرمەي، شەتەلدىك وقۋ ورىندارىنا كەپىلدى ءتۇسۋ تۋرالى ۇسىنىستارعا سەنبەۋگە شاقىرادى. اقشا اۋدارۋ الدىندا رەسمي كەلىسىمشارتتاردىڭ بولۋىنا كوز جەتكىزۋ، ءبىلىم بەرۋ ۇيىمىنىڭ اككرەديتاسياسىن تەكسەرۋ جانە تاڭدالعان وقۋ ورنىندا تىكەلەي قابىلداۋ شارتتارىن ناقتىلاۋ ۇسىنىلادى.
وسىعان ۇقساس جاعدايعا تاپ بولعان نەمەسە ىقتيمال زارداپ شەككەندەر تۋرالى اقپاراتى بار ازاماتتاردى ىشكى ىستەر ورگاندارىنا حابارلاسۋىن سۇرايدى.