امەريكا قۇراما شتاتتارىندا سيكلوسپورياز ىندەتىنە بايلانىستى العاشقى ءولىم جاعدايلارى تىركەلدى. ميچيگان شتاتىندا ەكى ادام قايتىس بولدى، ال ەل بويىنشا اۋىرعاندار سانى 18 مىڭنان استى، دەپ حابارلايدى infohub.kz.
ميچيگان شتاتىنىڭ دەنساۋلىق ساقتاۋ جانە الەۋمەتتىك قىزمەتتەر دەپارتامەنتى ەكى پاسيەنتتىڭ قايتىس بولعانىن راستادى. ۆەدومستۆونىڭ رەسمي مالىمدەمەسىندە: «ميچيگانداعى سيكلوسپورياز ىندەتى كەزىندە ەكى ءولىم جاعدايى انىقتالدى. مەديسينالىق دەرەكتەرگە سايكەس، ەكەۋىندە دە اۋىر قاتار جۇرەتىن اۋرۋلار بولعان، ولاردىڭ جاعدايى سيكلوسپورياز بەن سۋسىزدانۋ سالدارىنان ناشارلاۋى مۇمكىن. بۇل جاعدايلار بويىنشا قوسىمشا اقپارات بەرىلمەيدى»، — دەلىنگەن.
دەپارتامەنتتە سيكلوسپوريازدان بولاتىن ءولىم سيرەك كەزدەسەتىنىن، ويتكەنى ينفەكسيا «ادەتتە ومىرگە ءقاۋىپ توندىرمەيتىنىن» اتاپ ءوتتى. ميچيگاندا 11 234 اۋرۋ جاعدايى تىركەلگەن، 193 ادام اۋرۋحاناعا جات قىزىلعان.
العاشقى ولىمدەر تۋرالى اقش-تىڭ اۋرۋلاردى باقىلاۋ جانە الدىن الۋ ورتالىقتارى (CDC) دا حابارلادى. ۆەدومستۆو: «CDC ميچيگان تۇرعىندارى اراسىندا سيكلوسپوريازبەن بايلانىستى ەكى ءولىم جاعدايىن بىلەدى، ولاردا قاتار جۇرەتىن اۋرۋلار بولعان. بۇل جاعدايلار قازىرگى ىندەتكە قاتىستى»، — دەپ مالىمدەدى.
سيكلوسپوريازدى ميكروسكوپيالىق پارازيت قوزدىرادى، ول اعزاعا لاستانعان تاعام نەمەسە سۋ ارقىلى ءتۇسۋى مۇمكىن. ينفەكسيا قاتتى ديارەيامەن بىرگە جۇرەدى، ەمدەلمەگەن جاعدايدا بەلگىلەر ءبىر اي نەمەسە ودان دا ۇزاق ساقتالۋى مۇمكىن. ۇزاققا سوزىلعان ديارەيا سۋسىزدانۋعا جانە اۋىر اسقىنۋلارعا اكەلۋى مۇمكىن.
CDC دەرەكتەرى بويىنشا، بيىلعى ماۋسىمدا اقش-تا 18 مىڭنان استام سيكلوسپورياز جاعدايى انىقتالعان. ونىڭ 6707ء-ى زەرتحانالىق راستالعان، تاعى 11،5 مىڭعا جۋىعى قوسىمشا تەكسەرۋدەن وتۋدە.
FDA، CDC ماماندارى مەن شتات بيلىگى ينفەكسيانىڭ بىرنەشە وشاعىن تەرگەۋدى جالعاستىرۋدا. بۇعان دەيىن Taylor Farms كومپانياسىنىڭ ايسبەرگ سالاتىنىڭ پارتيالارى ساتىلىمنان الىنعان بولاتىن. جۇقتىرعان ءونىمنىڭ ءبىر بولىگى تۇتىنىلىپ قويعان نەمەسە سورەلەردەن الىنىپ تاستالعان بولۋى مۇمكىن.