اقتاۋ پورتىندا كاسپي تەڭىزىنىڭ ءتۇبىن 6–7 مەترگە دەيىن تەرەڭدەتۋ جۇمىستارى باستالدى. كولىك مينيسترلىگىنىڭ تۇسىندىرۋىنشە، بۇل ترانسكاسپي حالىقارالىق كولىك ءدالىزى (تحكد) بويىنشا تاسىمال كولەمىن ارتتىرۋ ءۇشىن قاجەت، دەپ حابارلايدى infohub.kz سايتى.
جۇمىستاردىڭ باستالۋىنا سۋ قويماسى دەڭگەيىنىڭ تومەندەۋى جانە ترانسكاسپي حالىقارالىق كولىك ءدالىزىنىڭ تيىمدىلىگىن ارتتىرۋ قاجەتتىلىگى سەبەپ بولدى.
جۇمىس بارىسىندا شامامەن 1،3 ملن تەكشە مەتر توپىراق الىنادى. ناتيجەسىندە سۋ ايدىنىنىڭ تەرەڭدىگى 6–7 مەترگە جەتۋى ءتيىس. ءتۇبىن تەرەڭدەتۋ پورتتىڭ وتكىزۋ قابىلەتىن ارتتىرىپ، تحكد بويىنشا تاسىمال كولەمىن 30%-عا دەيىن ۇلعايتۋعا مۇمكىندىك بەرەدى. سونىمەن قاتار تاسىمال قۇنى 10–15%-عا تومەندەيدى دەپ كۇتىلۋدە.
جوبانى جۇزەگە اسىرۋ پورتتى دامىتۋعا ينۆەستيسيا تارتۋعا جانە تەڭىز ءجۇزۋ قاۋىپسىزدىگىن ارتتىرۋعا ىقپال ەتەدى. مەردىگەر جۇمىس كەستەسىن ازىرلەپ قويدى. اعىمداعى ماسەلەلەردى جەدەل شەشۋ جانە قاتىسۋشىلاردىڭ ءىس-قيمىلىن ۇيلەستىرۋ ءۇشىن جۇمىس كەڭەستەرى تۇراقتى تۇردە وتكىزىلىپ تۇر. ءتۇبىن تەرەڭدەتۋ جۇمىستارىن جىل سوڭىنا دەيىن اياقتاۋ جوسپارلانۋدا.
بۇعان دەيىن قازاقستان كاسپي تۇبىمەن مۇناي قۇبىرىن سالۋ مۇمكىندىگىن زەرتتەيتىنى حابارلانعان بولاتىن.