اقتوبە وبلىسىندا كارىز قۇرىلىسىنا اقشا جيناپ الىپ، جۇمىستى باستاماعان مەردىگەرگە قاتىستى قىلمىستىق ءىس قوزعالدى، دەپ حابارلايدى infohub.kz سايتى.
اقتوبەدەگى جەكە سەكتور تۇرعىندارى ەكى جىل بۇرىن اۋداندارىنا كارىز جۇيەسىن سالۋى ءتيىس مەردىگەرگە جۇگىنگەن. قالا تۇرعىندارىنىڭ ايتۋىنشا، ولار ونداعان جىلدار بويى سەپتيك قولدانىپ، ايىنا ءتورت رەتكە دەيىن 8 مىڭ تەڭگەدەن سورعىزۋ اقىسىن تولەۋگە ءماجبۇر بولعان. ەكى جىل بۇرىن تۇرعىندار كوپجىلدىق ماسەلەنى شەشەمىز دەپ ۋادە بەرگەن كومپانياعا جۇگىنگەن. 28 ءۇيدىڭ ءارقايسىسىنان 300 مىڭ تەڭگەدەن جينالعان، الايدا جوندەۋ جۇمىستارى باستالماعان.
«اقشانى بىزدەن تالاپ ەتتى. مۇندا كىم تۇراتىنىن كورىپ تۇرسىز با؟ زەينەتكەرلەر كوپ. بۇل 300 مىڭدى نەسيەگە الدىق. ال ول ەكى جىل بويى ۋادە بەردى. كۇن سايىن! تراكتور كەلە جاتىر — ءبارىمىز دالاعا شىعامىز، تراكتور كەلە جاتىر! قۇبىرلاردى دا اكەلدى، ءۇش قۇبىر اكەلدى. ول بىزگە كۇن سايىن وتىرىك ايتتى!» — دەيدى اقتوبە تۇرعىنى زاۋرەش يمجاروۆا.
تۇرعىندار پوليسياعا ارىزدانعان. تۇرعىنداردىڭ ەسەبى بويىنشا، كەلتىرىلگەن شىعىن 9 ملن تەڭگەگە جۋىق. قۇقىق قورعاۋ ورگاندارى قىلمىستىق ءىس قوزعادى.
«اتالعان فاكتى بويىنشا ق ر قك 190-بابى "الاياقتىق" بويىنشا قىلمىستىق ءىس قوزعالدى. قازىرگى ۋاقىتتا دالەلدەمەلەردى بەكىتۋگە باعىتتالعان قاجەتتى تەرگەۋ ارەكەتتەرىنىڭ كەشەنى جۇرگىزىلۋدە. تەرگەۋ ارەكەتتەرىنىڭ ناتيجەلەرى بويىنشا زاڭدى شەشىم قابىلداناتىن بولادى»، — دەدى اقتوبە وبلىسى پوليسيا دەپارتامەنتى ءباسپاسوز قىزمەتىنىڭ جەتەكشىسى ەربولات سارقۇلوۆ.