الەۋمەتتىك جەلىلەردە اقتوبە سۋ قويماسىنىڭ جاعاسىندا ءولى بالىق پەن قۇستاردىڭ ولەكسەسى تۇسىرىلگەن ۆيدەو تارادى. وسىدان كەيىن ەكولوگتار سۋ ساپاسىن تەكسەرۋگە كىرىستى، دەپ حابارلايدى infohub.kz سايتى.
اقتوبە تۇرعىنى ايگەرىم تۇرلان Instagram-دا ۆيدەو جاريالاپ، اقتوبە سۋ قويماسىنىڭ جاعاسىنا ءولى بالىق پەن قۇستاردىڭ ولەكسەسى شىعىپ قالعانىن مالىمدەدى.
بۇل جازباعا اقتوبە وبلىسى ەكولوگيا دەپارتامەنتى جاۋاپ بەردى. «اقتوبە سۋ قويماسىندا ولگەن قۇستار مەن بالىقتار تابىلعان فاكتى بويىنشا جۇمىس توبى قۇرىلدى. ونىڭ قۇرامىنا دەپارتامەنت ماماندارى، اقتوبە وبلىستىق ورمان شارۋاشىلىعى جانە جانۋارلار دۇنيەسى ينسپەكسياسىنىڭ، تابيعي رەسۋرستاردى باسقارۋ جانە تابيعاتتى پايدالانۋدى رەتتەۋ باسقارماسىنىڭ، توبىل-تورعاي وبلىسارالىق باسسەيندىك بالىق شارۋاشىلىعى ينسپەكسياسىنىڭ، «قازگيدرومەت» رمك اقتوبە وبلىستىق فيليالىنىڭ، ۆەتەرينارلىق باقىلاۋ جانە قاداعالاۋ كوميتەتى اۋماقتىق ينسپەكسياسىنىڭ ماماندارى، سونداي-اق اقتوبە قالالىق ۆەتەرينارلىق ستانسياسىنىڭ وكىلدەرى كىردى»، — دەدى ۆەدومستۆو.
29 قىركۇيەكتە جۇمىس توبى اقتوبە سۋ قويماسىندا ولگەن قۇستار مەن بالىقتار تابىلعان جەرگە باردى. «كورسەتىلگەن جەردەن ۆەتەرينارلىق ينسپەكسيا ماماندارى زەرتحانالىق تالداۋ مەن زەرتتەۋ جۇرگىزۋ ءۇشىن ءتورت قۇستىڭ (شاعالانىڭ) ولەكسەسىن الدى. الايدا بەينەجازبادا كورسەتىلگەن ءولى بالىق (ءبىر دانا) مەن سۋدان الىنعان شاعالانىڭ ولەكسەسى تابىلمادى»، — دەدى دەپارتامەنتتە.
مامانداردىڭ الدىن الا قورىتىندىسى بويىنشا، الىنعان ءتورت قۇستىڭ ولەكسەسى كەبۋىنە، جۇمساق تىندەرىنىڭ بولماۋىنا جانە باسقا دا جاعدايلارعا بايلانىستى زەرتحانالىق تالداۋ مەن زەرتتەۋ جۇرگىزۋگە جارامسىز بولۋى مۇمكىن. «باسقا قۇستار مەن بالىقتاردىڭ ولگەنى نەمەسە جاپپاي قىرىلعانى تۋرالى فاكتىلەر تىركەلمەگەنىن اتاپ وتكەن ءجون»، — دەدى ەكولوگيا دەپارتامەنتىندە.
جۇمىس توبى اقتوبە سۋ قويماسىنىڭ ءۇش نۇكتەسىنەن سۋ سىناماسىن الدى: اقتوبە — قاندىاعاش اۆتوموبيل جولىنىڭ 14-شاقىرىمى اۋدانىندا؛ 41-رازەزدەگى قۇس فابريكاسىنىڭ ماڭىندا؛ اقتوبە سۋ قويماسىنىڭ تومەنگى بەفىندە.
«الىنعان سۋ سىنامالارىنا زەرتحانالىق تالداۋ مەن زەرتتەۋدى دەپارتامەنتتىڭ سىناق زەرتحاناسى جانە «قازگيدرومەت» رمك اقتوبە وبلىستىق فيليالىنىڭ تابيعي ورتانىڭ لاستانۋىن مونيتورينگىلەۋ كەشەندى زەرتحاناسى جۇرگىزەدى. زەرتتەۋ مەرزىمى — بەس جۇمىس كۇنى، 6 قازانعا دەيىن»، — دەدى ۆەدومستۆو.
سونىمەن قاتار ەكولوگيا دەپارتامەنتى «قازگيدرومەت» رمك وبلىستىق فيليالى اقتوبە سۋ قويماسىندا سۋ ساپاسىنا مەملەكەتتىك ەكولوگيالىق مونيتورينگتى اي سايىن جۇرگىزەتىنىن حابارلادى. «سۋ سىناماسى ءۇش نۇكتەدەن الىنادى: ەلەك وزەنىنەن، العا قالاسىنان 15 كم تومەن (سۋ قويماسىنان جوعارى)، تىكەلەي سۋ قويماسىنان، سونداي-اق سيليكات زاۋىتىنىڭ اۋدانىندا (سۋ قويماسىنان تومەن). 2025-2026 جىلدارداعى تالداۋ ناتيجەلەرى بويىنشا سۋدىڭ جوعارى جانە اسا جوعارى لاستانۋ فاكتىلەرى تىركەلگەن جوق. جۇمىس توبىنىڭ ناتيجەلەرى تۋرالى قوسىمشا حابارلاناتىن بولادى»، — دەدى ەكولوگيا دەپارتامەنتىندە.