الاياقتار قازاقستاندىقتارعا جوعالتقان اقشالارىن قايتارۋعا ۋادە بەرىپ، الداۋدىڭ جاڭا ءتاسىلىن ويلاپ تاپتى. infohub.kz سايتىنىڭ حابارلاۋىنشا، قىلمىسكەرلەر قازاقستان رەسپۋبليكاسىنىڭ قارجى نارىعىن رەتتەۋ جانە دامىتۋ اگەنتتىگى (اررفر) اتىنان جالعان قۇجاتتار تاراتۋدا.
ۆەدومستۆونىڭ ءباسپاسوز قىزمەتىندە اگەنتتىك ازاماتتارعا اقشا قايتارۋ ءراسىمىن، كريپتوۆاليۋتا بيرجالارىنداعى، كريپتوامياندارداعى جانە بانك كارتالارىنداعى ترانزاكسيالاردى تەكسەرۋدى، سونداي-اق اقشا قايتارۋ بويىنشا زاڭگەرلىك جانە وزگە دە قىزمەت كورسەتەتىن تۇلعالاردىڭ سەنىمدىلىگىن راستاۋدى جۇرگىزىپ جاتقانى تۋرالى جالعان اقپاراتى بار قۇجاتتىڭ تارالۋ جاعدايلارى انىقتالعانىن ايتتى.
اررفر تاراتقان قۇجات رەسمي ەمەس ەكەنىن، ونداعى بارلىق اقپارات شىندىققا سايكەس كەلمەيتىنىن اتاپ ءوتتى. اگەنتتىك ازاماتتارعا الاياقتىق نەمەسە وزگە دە وپەراسيالار سالدارىنان جوعالتقان قاراجاتتى قايتارۋ راسىمدەرىن جۇرگىزبەيدى جانە مۇنداي قىزمەتتەردى ۇسىناتىن ءۇشىنشى تۇلعالاردىڭ سەنىمدىلىگىن راستامايدى.
وسىعان بايلانىستى ازاماتتاردى اگەنتتىك نەمەسە باسقا مەملەكەتتىك ورگاندار اتىنان كەلىپ تۇسەتىن قۇجاتتارعا، حاتتارعا جانە حابارلامالارعا ساق بولۋعا شاقىرادى. بەلگىسىز ادامداردىڭ تالاپتارى بويىنشا اقشا اۋدارۋعا، سونداي-اق ءۇشىنشى تۇلعالارعا جەكە دەرەكتەردى، بانك كارتالارىنىڭ دەرەكتەمەلەرىن، SMS-كودتاردى، پارولدەردى جانە وزگە دە قۇپيا اقپاراتتى بەرۋگە بولمايدى.
ەگەر سىزگە وسىنداي قۇجاتتار نەمەسە اقشا قايتارۋ سىلتاۋىمەن كوميسسيالاردى، ساقتاندىرۋ جارنالارىن نەمەسە وزگە دە تولەمدەردى تولەۋ تالاپتارى كەلىپ تۇسسە، تولەم جاساماڭىز جانە قۇقىق قورعاۋ ورگاندارىنا حابارلاسىڭىز.