قازاقستاننىڭ ءبىرىنشى راكەتكاسى الەكساندر بۋبليك اپتا باسىندا كاسىبي تەننيسشىلەر قاۋىمداستىعىنىڭ (اتپ) توپ-20 رەيتينگىنەن شىعىپ قالدى. ەندى ول ەرتەڭ لوندوندا وتەتىن لەيۆەر كۋبوگى-2026 اياسىندا الەم قۇراماسى ساپىندا ەكى ماچ وتكىزەدى، دەپ حابارلايدى infohub.kz سايتى.
الەم قۇراماسىنىڭ ەۋروپا قۇراماسىنا قارسى لوندوندىق ماچىنا بۋبليك كوماندا كاپيتانى اندرە اگاسسيدىڭ جەكە شاقىرتۋىمەن قاتىسىپ وتىر. ەرتەڭ الەكساندر كورتقا ەكى رەت شىعادى. جەكەلەي سىندا ول رافاەل حودارمەن، ال جۇپتىق رازريادتا (تەيلور فريتسپەن بىرگە) كارلوس الكاراس پەن ياكۋب مەنشيككە قارسى وينايدى.
بۋبليكتىڭ ەكى ماچىنان بولەك، ءتۋرنيردىڭ ءبىرىنشى كۇنى كاسپەر رۋۋد فرانچەسكو چەرۋندولومەن، ال مەنشيك برەندون ناكاشيمامەن كەزدەسەدى.
اتاقتى اۆستراليالىق تەننيسشى رود لەيۆەردىڭ (ءقازىر 88 جاستا) قۇرمەتىنە اتالعان لەيۆەر كۋبوگى توعىزىنشى رەت وتكىزىلىپ وتىر. وعان التى ەۋروپالىق تەننيسشى جانە قالعان الەمدى تانىستىراتىن سونشا سپورتشى قاتىسادى. ۇشەۋى اتپ رەيتينگى بويىنشا اۆتوماتتى تۇردە ىرىكتەلسە، تاعى ۇشەۋىن كاپيتان شاقىرادى.
ءۇش كۇن ىشىندە 12 ماچ (9 جەكەلەي جانە 3 جۇپتىق) وينالادى. ءبىرىنشى كۇنگى ءار ويىنداعى جەڭىس كومانداعا 1 ۇپاي اكەلەدى. ەكىنشى كۇنگى ماچتارداعى ءار جەڭىس 2 ۇپايمەن باعالانادى. ءۇشىنشى كۇنى جەڭىستىڭ قۇنى ءۇش ۇپايعا دەيىن كوتەرىلەدى.
13 ۇپايدى ءبىرىنشى جيناعان كوماندا جەڭىسكە جەتەدى. ەسەپ 12:12 بولعان جاعدايدا جەڭىمپازدى قوسىمشا جۇپتىق ماچ انىقتايدى.
بارلىق ماچ ءۇش سەتتەن وينالادى، ال ءۇشىنشى سەت 10 ۇپايعا دەيىنگى تاي-برەيك فورماتىندا وتەدى.
كورمەلىك دەپ اتاۋعا تولىق نەگىزى بار تۋرنير ءۇشىن اتپ رەيتينگىنە ۇپاي بەرىلمەيدى. سوعان قاراماستان بارلىق تەننيسشى جەكە تولەم الادى. ال جەڭگەن كوماندانىڭ ءار مۇشەسى بانك شوتىنا قوسىمشا 250 مىڭ دوللار قوسادى.
تۋرنير نەگىزى قالانعاننان بەرى پراگا (2017)، چيكاگو (2018)، جەنەۆا (2019)، بوستون (2021)، لوندون (2022)، ۆانكۋۆەر (2023)، بەرلين (2024) جانە سان-فرانسيسكو (2025) قالالارىندا ءوتتى. «ەۋروپانىڭ» ەنشىسىندە ازىرگە بەس جەڭىس بار، «الەم» ءۇش رەت جەڭىسكە جەتكەن.