لەيۆەر كۋبوگىندا تۇڭعىش رەت ويناعان قازاقستاننىڭ ءبىرىنشى راكەتكاسى الەكساندر بۋبليك ءبىر كەشتە ەكى رەت جەڭىلىس تاپتى، دەپ حابارلايدى infohub.kz سايتى.
الەم قۇراماسى ساپىندا ونەر كورسەتكەن قازاقستاندىق تەننيسشى الدىمەن يسپانيالىق رافاەل حودارعا – 2:6، 3:6 ەسەبىمەن جول بەردى. كەيىن امەريكالىق تەيلور فريتسپەن جۇپتاسىپ، كارلوس الكاراس (يسپانيا)/ياكۋب مەنشيك (چەحيا) تاندەمىنە – 4:6، 4:6 ەسەبىمەن ۇتىلدى.
ەۋروپا مەن الەمنىڭ قالعان بولىگى اراسىنداعى كورسەتىلىم ماچىنىڭ ءبىرىنشى كۇنىنەن كەيىن ەسكى دۇنيە تەننيسشىلەرى – 3:1 ەسەبىمەن الدا تۇر.
اتاقتى اۆستراليالىق تەننيسشى رود لەيۆەردىڭ (ءقازىر 88 جاستا) قۇرمەتىنە اتالعان لەيۆەر كۋبوگى توعىزىنشى رەت وتكىزىلىپ وتىر. وعان التى ەۋروپالىق تەننيسشى جانە الەمنىڭ قالعان بولىگىن بىلدىرەتىن سونشا سپورتشى قاتىسادى. ۇشەۋى ATP رەيتينگى بويىنشا اۆتوماتتى تۇردە ىرىكتەلسە، تاعى ۇشەۋىن كاپيتاندار شاقىرادى.
ءۇش كۇن ىشىندە 12 ماچ (9 جەكە جانە 3 جۇپتىق) وينالادى. ءبىرىنشى كۇندەگى ءار ويىنداعى جەڭىس ءۇشىن كوماندا 1 ۇپاي الادى. ەكىنشى كۇندەگى ماچتارداعى ءار جەڭىس 2 ۇپايمەن باعالانادى. ءۇشىنشى كۇنى جەڭىستىڭ قۇنى ءۇش ۇپايعا دەيىن كوتەرىلەدى. 13 ۇپايدى ءبىرىنشى جيناعان كوماندا جەڭىسكە جەتەدى.
بارلىق ماچ ءۇش سەتكە سوزىلادى، ال ءۇشىنشى سەت 10 ۇپايعا دەيىنگى تاي-برەيك فورماتىندا وينالادى.
«ەۋروپانىڭ» ەنشىسىندە ازىرگە بەس جەڭىس بار، «الەم» ءۇش رەت جەڭىسكە جەتكەن.