الماتىدا ەگىزباەۆا كوشەسىندەگى جاڭا مەكتەپ ماڭىنداعى ۋچاسكەدە اعاش كەسۋ جۇمىستارى قايتا جانداندى. اكىمدىك بۇل جۇمىستاردىڭ رۇقسات ەتىلگەنىن جانە جوبامەن قاراستىرىلعانىن مالىمدەدى، دەپ حابارلايدى infohub.kz.
الماتى اكىمدىگى ەگىزباەۆا كوشەسىندەگى اعاش كەسۋگە قاتىستى تۇسىنىكتەمە بەردى. جۇمىستار الماتى قالاسى ەكولوگيا جانە قورشاعان ورتا باسقارماسى بەرگەن رۇقسات نەگىزىندە جۇرگىزىلىپ جاتقانى اتاپ ءوتىلدى.
«اعاش كەسۋ ەگىزباەۆا كوشەسىندەگى جاڭا جالپى ءبىلىم بەرەتىن مەكتەپكە كىرەبەرىس جول سالۋ جوباسىن ىسكە اسىرۋ اياسىندا زاڭدى نەگىزدە جۇرگىزىلۋدە»، — دەلىنگەن حابارلامادا.
بۇعان دەيىن ۋچاسكەنىڭ ءبىر بولىگىندە جۇمىستار ۋاقىتشا توقتاتىلعان بولاتىن. سەبەپ — جوبانى ىسكە اسىرۋ ءۇشىن قاجەتتى جەر ۋچاسكەلەرىن ساتىپ الۋ ءراسىمى.
ايتا كەتەيىك، بارلىق قاجەتتى راسىمدەر اياقتالعان سوڭ اعاش كەسۋ قايتا جانداندى. جۇمىستار بەكىتىلگەن جوبالىق قۇجاتتاماعا سايكەس جالعاسۋدا.
«اعاش كەسۋ تەك قۇرىلىس جوباسىندا كوزدەلگەن اۋماق شەگىندە عانا جۇزەگە اسىرىلاتىنىن اتاپ وتەمىز»، — دەلىنگەن حابارلامادا.
اكىمدىك ءاربىر كەسىلگەن اعاش ءۇشىن وتەمدىك وتىرعىزۋ قاراستىرىلعانىن اتاپ ءوتتى. جاڭا كوگالداندىرۋ جۇمىستارى جۇرگىزىلگەننەن كەيىن ولارعا ءۇش جىل بويى كۇتىم جاسالۋى ءتيىس.
«قولدانىستاعى ەرەجەلەرگە سايكەس، ءاربىر كەسىلگەن اعاش ءۇشىن مىندەتتى وتەمدىك وتىرعىزۋ جانە كەيىننەن ءۇش جىل بويى كوگالداندىرۋعا كۇتىم جاساۋ قاراستىرىلعان»، — دەپ تۇيىندەدى اكىمدىك.